Ngoloneya waShikoto Penda Ya Ndakolo okwa tameka okukwatela komesho oshikonga shokuyandja omayakulo haa di kombelewa yoikwameni.
Omayakulo aa okwa kwatela mo okuyandja omikanda doufemba ngaashi eendjapo domadalo noumutwe kovakwashiwana ve li moshitukulwa shaye.
Ya Ndakolo okwa ti moshitukulwa shaye omu na oikandjohoololo ihapu i na ovanhu vehe na oufemba woshilongo shaashi ovanhu vahapu ihava mono omayakulo opashiwana shaashi kave na
oufemba.
Okwa ti naashi osha eta opo ombelewa yaye i kale ya ninga oshikonga eshi opo ku kwashipalekwe kutya oshiwana osha mona omaufemba.
Edi ngoloneya okwe di popya Etivali eshi a ninga eenghundafana naKundana a hokolola ta ti ombelewa yaye otai lalakanene okukala ya kwafela ovanhu aveshe mOshikoto va mone omaufemba shaashi osha fimana ngeenge omunhu e na oufemba woshilongo.
“Otwa ninga ekwatafano nouministeli woikwameni netonatelo lokeengamba opo tu longele kumwe nawo eshi hatu ka ya momikunda tu ka yandje omaufemba koshiwana,” Ya Ndakolo ta ti.
Okwa ti otava ka longela yoo vali kumwe nouministeli woukashikekookanhu opo u yambidide okushangifa ovakulupe, ovanhu ve na oulema neefiye.
Ya Ndakolo okwa hokolola ta ti oshikandjoololo shaNehale lyaMpingana osho shimwe sha didilikwa shi na omwaalu muhapu woshiwana shihe na oufemba mokufaafanifa noikandjohoololo ikwao.
“Otwa didilika ovanhu vahapu va taalela eshongo loshimaliwa shokuya keembelewa doikwameni kOmuthiya shaashi ovanhu ohava di komikunda dokokule,” Ya Ndakolo ta ti.
Okwa weda po ta ti ounona navo ova taalela eshongo linene eshi vehe na eedjapo domadalo, omanga vamwe ove na ooina va dala novakwashiwana vaAngola.
Okwa ti omudo wa dja ko ombelewa yaye oya tameka noshikonga shokuyandja oufemba komikunda ngaashi Emanya naAntoni di li moshikandjohoololo shaNehale lyaMpingana eshi kwa li oshiwana sha mona oufemba 47 weedjapo domadalo noumutwe vaheyali.
Okwa kunghulila oshiwana opo shi kale tashi longele kumwe novanambelewa pefimbo loshikango eshi nokukala yoo vali sha yandja ouyelele womondjila ngeenge tashi pulwa kovanambelewa.