OSHAKATI – Aantu oyendji mOshakati anuwa otaya ningi ongeshefa moku kwashilipaleka oomwenyo dhaantu nomahangano gomakwashilipaleko.
Shika otaye shi ningi onga ongesha yoku imonena oshimaliwa mbala, sho taya nyolitha aantu kaaya shi aapambele yawo, yamwe nokuli kaye ya shi, shampa owala ya uvu kutya omuntu gwontumba ota ehama.
Iiningwanima mbika nonando tayi lopotwa miitopolwa yilwe yoshilongo okwa ndhindhilikwa ya vuka momalukanda gaShakati, moka anuwa muna okangundu kaanyasha haya topolelathana uuyelele nokupaathana uutse gwaantu mboka taya ehama.
Aantu otaya longitha ompito ndyoka okuninga ongeshefa oshoka oshipu okushangitha kehe ngoka, uuna pena uuthemba oshoka omahangano gokukwashilipaleka ihaga ningi omapekapeko oku tala ngele oya pambathana shili.
Oshingwanima oshitalala osha holoka mOshakati shokuuninginino, sho omukiintu gwomimvo dho po kati, gwedhina Aina Nangombe Maati ngoka a ndhimbulula kutya omwenyo gwe ogwa ningilwa ekwashilipaleko konima sho a kutwa okatse ke kumushiinda she ngoka anuwa emu fundju kutya ote mu kongele iilonga. Pethimbo mpoka Maati anuwa okwali ta ehama a monika okaankera.
“Onda mono uuyelele awuhe kutya ngele onda mana oondjenda, onda nyolwa mehangano lyoMetropolitan, komukiintu gwedhina Jacky Mekondjo a shangitha ndje noshimaliwa shoN$100 000 oshowo kuFillemon Ludwig kOld Mutual a shangitha ndje noN$500 000,” ta po pi ngaaka.
Oshikundaneki nasho osha mono uuyelele kaanambelewa yomahangano ngoka kutya Maati okwa kwashilipalekwa shili kooLudwig naMekondjo.
Maati ota ti okwa li a gandja okatse ke kumushinda she gwedhina Ndina Namukwambi a tseyika nawa nedhina “Nakuti”.
Oku wete kutya Nakuti oye a gandja okatse ke kuMekondjo oshoka aakiintu mboka ookuume kopothingo, omanga Ludwig eli kuume kaMekondjo.
Ta hokolola kutya nonando ina mana ko omahangano agehe gomakwashilipaleko, okuna uuyelele wa gwana kutya okwa shangithwa komahangano ga yooloka kaantu yamwe yiili.
Ta gwedha po ta ti, omolwa ethimbo ina vula okuthika komahangano agehe ashike ota tsikile noku handa mo mboka taya kambadhala oku ninga ongeshefa momwenyo gwe.
“Omumvo gwa ziko onda monika omandhindhiliko gwokaankera koshivalela ngoka kwali taga ulike geli ponkatu ontintatu, omolwa uumbanda wa kwatandje ombinzi yandje oya kala tayi londo nokulunduluka ethimba alihe,” ta hokolola ngaaka
Maati ta ti, oshoka okwali a pewa epitikilo okukala tiikonaakona omanga eli kegumbo ye a fale shoka a ndhindhilika mombinzi. Ta ti okwa pula ekwatho kuyina yaNakuti ngoka a kala temu konaakona oshoka oshoka okwali omupangi.
Mpoka opo Nakuti a mono uuyelele kutya Maati oku na okaankera.
“Sho tandi po pi ngiika onda pangwa no nda manguluka, kandi na sha we okaankera,” ta po pi ngaaka.
Maati okwa hokolola kutya okwali iindilwa okamutse ke kuNakuti, anuwa ta ti okwe mu monena iilonga mositola yimwe onene yomondoolopa.
Anuwa oshoka okwa kala a hala iilonga yili po pepi ka kwali a ndilandhila lwaali okwagandja okamutse ke.
“Onkundana oya thiki ndje oomwendhi dha zi ko sho omwaalu gwaantu tagu ende guuka pombanda, taya pula ndje ngele onda za mo mombete yuuwehame sho nda monika okaankera,” ta hokola ngaaka.
Maati okwa po pi ta ti, uuyelele onde wu mono nawa sho gumwe go mookuume kaNakuti a yakele ndje ko kutya Nakuti okwa gandja okamutse kandje ka longithwe okushangwa momahangano gokukwashilipaleka.
Ta ti, shoka osho shali she mukutha momutumba a ka konge uuyelele komahangano gokukwashilipaleka, ngele okwa shangwa shili oshoka ka pena nando ogumwe maakwanezimo ye yemushangitha.
Aafekelwa
Martha Namupa Maati omumwayina gwa nakuningwa oshihakanwa okwa ti, okwa kala ta lundilwa mondoolopa kutya oye ta landitha po mumwayina sho kwali ta ehama.
“Onda hala aantu mboka ya katukilwe onkatu oshoka oya kwata omadhina getu nongilishe. Otwa hala okuva kutya okamutse kamumwameme okalongithwa ishewe shike,” ta nyenyeta ngaaka.
Ta ti, nayo mba aakwanezimo yaMaati inaye mu shangitha ihe okamutse kamumwayina otaka taambathanwa kaayeni.
Omunambelewa omukuluntu mositola moka anuwa kwali tamu kongelwa Maati iilonga sho a pulwa kuKundana, okwa ti, yo ihaya kutu nuumutse.
“Ngame natango ihandi kutu aaniilonga, otuna mboka taya longo nokukuta, edhina lyandje olya katala mo shike mehokololo moka, ngame kandi shi kuume kaayehe mboka,” ta pula ngaaka.
Ta ti, shoka ya ningi oshapuka sho oshanika oshiponga, ta ti naya yeleke endhina lye.
Monkundathana noshifokundaneki shika Nakuti okwa ti, ye ina gandja okamutse kaMaati kookume ke, ihe okwali ashike teke mu kongelela iilonga mbyoka oye a kala teyi pula.
“Okwa kala ha pulandje ndi mu kongele iilonga oshoka anuwa ondi shi aantu oyendji, sho shoka ndaka tala ko okamutse ke, oye mwene a lombwele ndje ndike ka tale maandjawo,” ta hokola ngaaka.
Nakuti okwa pula kutya oshike e na okugandja okamuste kaantu, iteka longitha ashike ye mwene okushangitha oshimaliwa she fumbiko.
Ta ti, uuyelele mboka ne wu konge manga maakwanezimo ye, opo a uve oshili.
Mekondjo sho a pulwa ngele okwa shangitha Maati okwa ti ye ine mu shangitha, sha po ope na ngoka a longitha endhina lye.
“Oshike ndina okushangithila Maati? Ina lundila ndje inandi shi ninga. Maati okushi ngaa kutya aantu ohaya vulu okufutithwa ngele ta lundile aantu, ondi na okumu pula a yelithile ndje,” Mekondjo ta yamukula ngaaka.
Uuyelele
Omunambelewa omukulunti meMetropolitan mOshakati Mathew Negumbo sho a pulwa a tye ko sha koshiningwanima shika okwa ti, ita vulu okupopya sha nokwa tumine omutoolinkundana ngula koombonge dhawo kOshakati.
Onkambandhala okumona omupopiliko gwehangano lyoMatropolitan oya huulile muunyengwi sho ongodhi yombelewa ka kwali itaayi kuthwa po omasiku agehe gaali.
Omuniilonga gumwe gwomehangano lyOld Mutual Silas Markus okwa ti, uuna omuntu ta shangitha omuntu shaali pa halo lye ondjo, ota vulu okupatulilwa oshipotha kopolisi.
Thoini Shikongo ngoka ha shanga mehangano lyoSanlam okwa li a fatulula kutya, okushangitha omuntu ine ku pamba nenge kaashi li pehalo lye osha puka.
“Onde shi tsakaneke olundji kutya aantu otaya shanga aantu nonando kaye ya shi, nuunene ngele ya ndhindhilike kutya oye li muuwehame,” ta popi ngaaka.
Ta ti, uuna shoka sha ndhindhilikwa, aapambele oya manguluka okuthika poombelewa nokugandja omanyenyeto gawo.
Selma Nampila gomOshakati, okwa ti, omahangano ngoka naga tule po ekankameno okwiindika kehe gumwe ta shangitha omuntu keeshi omupambele gwe.
“Osha nika oshiponga okukala tu li ashike mombepo nani otwa shangithwa nale kaantu yaashi aapambele yetu. Omaso getu oga ningwa oongeshefa kaantu kaatu ya shi, kashi li mondjila,” ta nenyeta ngaaka.
Omutseyiveta ngoka inaa hala oku tumbulwa noku li omukalimo gwomOshakati okwa ti, onkundana ndyoka kayi shi ompe mOshakati, oshinima tashi dhana onkandangala mondoolopa moka.
Sho osho a kumagindha aakalimo mOshakati ya kwate nawa uuthemba wa wo oshoka aantu oya hala okukala aazeko okupitila momaso gaantu.
“Aantu omo yeli mOshakati muka taya shangitha aantu, uune ngele yuuvu taya ehama. Yo taye ya talele po kiipangelo omanga aakwanezimo yawo kaa shi shi,” ta nyenhyeta ngaaka.
Shoka tashi ningwa mOshakati oshinyanyalitha.
Opena wo natango uuyelele kutya opena gumwe mOshakati a landa ohauto sho a mono oshimaliwa sha nakusa gumwe ali e mu shangitha, ihe inaya pambathana.
Oshifokundanheki shika natango oshali sha shanga ehokololo kombinga yaashangi yomahangano taya andjaneke uuthemba waantu moshigwana, ya vule okushangitha aantu nando kaye shi aapambele yawo, yo nayo ya mone oshimaliwa ngele nakushangwa a hulitha.
Linda Jenestus okwa nyenyeta ta ti, okwa li pe na oshiningwanima shomumwayinamati ngoka a li a shangwa kukuume ke kopothingo ngoka a li natango a andjaneke uuthemba waantu kookuume ke.
“Shika okwa li twe shi dhimbulula konima aakwanezimo yetu ya li ya shunithwa ko kehangano lyoSanlam kutya itali vulu okugwedha mo we aantu shoka aantu oyendji unene ya shangwa momuntu gumwe,” ta holola ngaaka.
Ta ti, shoka okwa li sha limbilike aakwanezimo e taye shi landula sigo okoombelewa oonene.
Jenestus okwa ti oya li ya ndhindhilike aantu ya thika puyahetatu inaaye ya pamba nando ya shangitha omulumentu ngoka, nakusa paife.
“Oshiningwanima shika osha yemateke aakwanezimo yetu, kutya ope na aantu ya mono iimaliwa medhina lyeso lyomupambele gwawo, omanga kaye shi shi,” ta nyenyeta ngaaka.
Ta ti, oya li ya kutha onkatu sigo ya pondola okufutitha po yamwe etata lyoshimaliwa shoka ya li ya shangitha.
“Gumwe okwa li a shangitha N$30 000 okwa li ya galula N$15 000. Nonando shoka okwa li sha ningwa, haayehe ye shi ningi, oshoka yamwe ka yeshiwike natango” ta hokolola ngaaka.
“Ngoka ta dhana onkandangala omushangi, oshoka oha futwa oshimaliwa kwaayehe a gandja kuyo uuthemba, uuna nakushangithwa a hulitha,” ta ti ngaaka.
Ta kumagidha oshigwana shi kale sha kotoka uuna tashi shangwa.