KATIMA MULILO – Muuna walilimo zemashumi amane kazene, Steven Sydney Naruseb, yana ikisize kwa siteshini sa mapokola Labubeli, kulatelela lifu la nyazi yahae ni mahe mwana’hae wa musizana walilimo liketalizoho, Rachel Ikume Simasiku (33), nahanezwi kutomelwa masheleñi akulibelela taba yahae kwande atolongo.

Naruseb ukulubelwa kuli nabulaile Simasiku busihu bwa Lasunda kanako ya 21h00 pili asika baleha. Nabonahalile lwapili mwa khuta ya sikiliti ya Katima Mulilo Labune, teñi muatuli mwa khuta ye nyinyani Davy Kambinda naisize taba la 22 Lungu 2026, kuli lipatisiso lizwelepili nikuli ya nyaziwa abate muyemeli wamulao. Cedrick Mundia nayemela mubuso.

Piho ya mapokola ibulela kuli, nyandi na isizwe kwa sipatela sa Katima Mulilo sa Mubuso ki limembala za lubasi kanako ya 21h45, ili bane bailo biha kuli na natilwe ki nyazi ya hae manzibuana aswana kanako ya 21h00 kwa komponi ya Choto. Lipatisiso za makalelo neli patuluzi kuli nyandi na utwilwe ahuweleza mwandu, kiba ba yahile mabapa, bane balikile kuli bamupuluse kono ndu ne kiyezwi mwahali. “Ba ba yahile mabapa haba nangela fa lihaulo mwa muzuzu nyandi nasweli kuhuweleza, babona nyazi wa nyandi asweli tipa mwa lizoho, mi atimisa maboni,” nekubaleha piho ya mapokola. Piho ibulela hape kuli ba ba yahile mabapa ili basali kaufela, neba palezwi kukena mwandu. Neba ize neba zwezi pili ku utwa lilata kuzwelela mwandu kufitela nyandi hasiya kuhuwa.

Kasamulaho anakonyana, yakulubelwa atozwa famunyako nikubulelela ba ba yahile mabapa kuli balizeze mapokola kakuli nase “afelize zana eza,” mi aikela ashimbile makatulo ahae. Kasamulaho Naruseb afunduka ba ba yahile mabapa balizeza mapokola.  Habakena mwa muzuzu mwana huweleza nyandi bato mufumana alapami mwa mali asa nyanganyi. Namatiselizwe kwa sipatela ki limembala za lubasi mi ayo patalazwa kuli utimezi hayo fita feela.  Mapokola habayo batisisa mwandu bafumana mufinyani wa capu ulambekilwe mali, ni lika zene bonhala inge milili ya mutu. Nebafumani cwalo ni foni yekulubelwa kuli kiya nyandi ipwacehile. Kaufela neli ngilwe kuba bupaki. Nyandi Simasiku nailo bulukwa maabani kwa matotaeti akwa Dairy mwa Katima Mulilo.