Victoria Kaapanda
ONGWEDIVA-Oproyeka yedhina Onangoma Ikwathela oya patulula oshikuku shoondjuhwa pambelewa Etitatu lyoshiwike shika momukunda Onangoma moshitopolwa shaShikoto.
Oproyeka ndjoka ya totwa po kaavali 16 mboka ye na aanona taya hiti osikola pOnakathilo, oyi na oondjuhwa 20, dha iyambwa kaavali oku eta po oshikuku shawo shoondjuhwa.
Ehangano Dream oli na oshinakugwanitha shokunkondopaleka nokukumagidha aanona yaakadhona ye na oomvula omulongo sigo 24.
Mekwatelo komeho lyomunyasha omugundjuka ngoka ta idhewula onge omuhungimwenyo mehangano ndyoka Omagano Mwatile, ota ti oshoshili kutya aavali oye ya po noproyeka yoondjuhwa.
Mwatile okwa li a fatulile Kundana ta ti, Ehangano lyoDream ndyoka hali kwathele aanona yomimvo dha zi nokutumbulwa momikalo dha yooloka, oli na oprograma tayi ithanwa “VILLAGE Saving Loan” (VSL) ndjoka oyo ya hwahwameke noku etitha po oproyeka ndjoka.
“Ehangano ndika ohali longo okuudha moshitopolwa shaShikoto ashike, nakashona moKhomas oshowo Zambezi. MOshikoto omu na ooproyeka 49 adhihe kumwe dhi li kohi yehangano lyoDream,” Mwatile ta ti ngaaka.
Ta gwedhapo ta ti elalakano lyokutota poi VSL, okukwathela aakuluntu momukunda uuna ye na uupyakadhi woshimaliwa. Ta ti ohashi ya kwathele uuna ya pumbwa oshimaliwa shomeendelelo nohaye shi galula nethimbo lyawo niihohela iishonashona.
Shino otashi yanda aavali ya kale kaaye na omikuli mpeya naampeyaka. Oshimaliwa shoka ohaye shi gongele yoyene, sho haya gongala lumwe moshiwike nokugandja oshimaliwa kehe momuvali sha ikwatelela kwaashoka e na po, oku tameka N$ 10 sigo N$ 50.
Omunashipundi gwoproyeka ndjika Magriet Hamhola okwa ti oproyeka yawo ndjoka ya li ya tototwa po muAguste numvo otayi ende nawa.
Ta ti omapandulo otaye ga gandja kuMwatile, ngoka oye a kala te ya pe omukumo nomayele nkene ye na okunkondopaleka oshimaliwa shawo.
Hamhola okwa li a kumagidha oproyeka ya zi komukunda gopuushinda Onzinzi opo ya kuthe ko oshiholelwa nkene ye na okunkondopaleka oshimaliwa shawo.
Oproyeka esiku ndyoka oya li ya shingitha iikulya yomaludhi nomaludhi, nelalakano lyokumona oshimaliwa ya tsikile oshikuku shawo shoondjujhwa oshowo okumona oshimaliwa shokulanda iikulya nonando ya li ya yambidhidhwa kuMwatile niikulya yoondjuhwa.
Ooprogalama dha tya ngaaka ohadhi kwathele aavali, nkene ye na okulonga aanona yawo, oku eta po omadhiladhilo tage ke ya kwathele monakuyiwa okupitila mootundi dhomapukululo hadhi pewa aavali okuzilila kehangano Dream.