Loide Jason
Ongundu yopolitika ndjoka tayi pangele moshilongo yedhina Swapo oya patululilwa oshipota kongundu yompilameno sho ya taaguluka oondjindikila ndhoka dha tulwa po kepangelo ngele tashi ya mokukondjitha ombuto yoCovid-19.
Oshipotha shokuya oondjindikila moshipala osha li sha patululwa kongundu yoLandless People’s Movement (LPM) nongundu yoPopular Democratic Movement (PDM) shoka sha patululwa mOmaandaha poshitaasi shopolisi mOvenduka.
Ongundu Swapo oya li ya ningi okangundumano okashona hoka ka li ke na aantu ye vulithe pomulungo, omanga epangelo lya tula po ondjindikila kutya hamuntu a ningi oshigongalele shaaantu ye vulithe 10. Omugandjimayele omukuluntu mopolisi Deputy Commisioner Kauna Shikwambi , okwa hokolola kutya mboka aatamanekwa moshipotha shoka sha patululwa, omupresidente gwoshilongo Hage Geingob , Omupevipresidente Nangolo Mbumba, Amushangandjayi gwoSwapo Sophia Shaningwa, Omuprima gwoshilongo Saara Kuugongelwa-Amadhila, Omuprima gwopevi Netumbo Nandi-Ndaitwa, noshowo oonakulwa aakulu yoSwapo mboka ya li ya gongala pokagongi mpoka. Shikwambi okwa ti kutya Swapo okwa li a ngunduma pehala lyi li mOvenduka tali ithanwa Parliament Garden naantu mboka ya li ye ya mpoka okwa li oyendji. Okwa ti aatoolinkundana mboka woo nayo ya ende oshigongi shoka okwa li ya kwatelwa mo moshipotha shoka onga aatamanekwa. Ngashiingeyi kapu na nande ogumwe a mangwa po nenge a futithwa egeelo lyepogolo ndyoka, nomakonaakono moshinima shoka otaga tsikile.