Hilma Nakanduungile 

ONDOBE – Aakalimo yomoshitopolwahogololo shaNdobe moshitopolwa shaHangwena ye vulithe 152 oya pewa iilya yomahangu kombelewa yakamnsela gwaNdobe, oshiwike shika. Sho a popi pematulo lyiigandhi, kamsela gwoshikandjohogololo shoka, Helaria Ndjuluwa okwa ti, okwa koneke oshigwana tashi talele po unene ombelewa ye molwa ompumbwe yiikulya, onkene melongelokumwe naanangeshefa, ooyene yomikunda nosho wo okomitiye, opwa totwa opoloyeka yedhina “Naungungulu novanha, okaanda neengudi dako”, ku paluthwe oshigwana nokutsakaneka epangelo ondjilakati

Ndjuluwa okwa yelitha kutya, opoloyeka ndjoka ya totelwe mo2023 ohayi gongele iilya yomahangu okuziilila kooyene yomikunda nosho wo aanangeshefa, etayi tulwa miigandhi yi li pombelewa ye, moka aakwashigwana haya matulilwa. Ta gwedha ko kutya, kakele kiilya mbyoka hayi gandjwa kaanangeshefa nooyene yomikunda, opoloyeka ohayi landa wo iilya noshimaliwa sha za moshiketha shayo. 

“Shika osho oshikando oshithamano tatu matula. Otwa hala aantu ya ka dhunge oontaku dhawo, yo ya ka teleke uutete woyana. Omumvo gwa yi otwa matulila iipangelo yetu yi li itatu moshitoplwahogololo, moka kehe koshipangelo twa fala ko oolata 20,” Ndjuluwa ta ti ngaaka.

Ta yelitha kutya, moshitopolwahogololo she omu na omikunda dhi li 32, nomukunda kehe oha mu zi aakalimo yane taya mono olata yomahangu konima yoomwedhi mbali kehe.

Ndjuluwa ta dhenge omuthindo punkene opoloyeka ndjika yi li ekwatho moshigwana.

“Nuumvo otu na omagumbo ge li gahetatu ga pya po, ashike oonakuninga iihakanwa otwe ya kwathele niilya twa kutha miigandhi moka. Otwa ningila kutya, omuntu ngele okwa pilwa, ite ya pombelewa e ta zi po inaa kwathwa. Ohatu yambidhidha wo momagumbo moka mu na oosa, uuna aakalimo yamo ye li mompumbwe ngaashi oothigwa tadhi ilele,” Ndjuluwa ta yelitha.

Kepulo ngele omayambidhidho goludhi nduno itaga taandeleke onyalo, Ndjuluwa okwa ti ahawe, nokwa tsu oshigwana omukumo opo shi longe nuudhiginini.

Tresia Ndulumba okwa pandula kamsela kedhiladhilo lyopoloyeka nonkandangala tayi dhana moshigwana. Ta kunkilile wo oshigwana opo shaa kale shokupewa, ihe shi longe nuudhiginini.

“Onda hala ooyene yomikunda naaleli yawo ya tse oshigwana omukumo opo shaa kale shi ininga shoku pewa sho inaashi hala okulonga. Yamwe ohaya menekele koondingosho, ashike ngele taku tiwa aantu naya ka taambe iikulya, oyo ya hala okukala yotango. 

Aaleli naya popye noshigwana, opo twaa ethele omeya monduda,” ta indile.

Yimwe po yomoompumbwe dhopoloyeka ndjika oyo oshini shokutsitha, opo ku kale taku gandjwa uusila kaakulupe pehala lyoku ya pa iilya, molwashoka yamwe kape na ngoka te ya tsile. 

“Ngele otwa mono eshina lyokutsitha, shika otashi gandja wo oompito dhiilonga kaagundjuka yetu, noshimaliwa shoka tashi zi mo otashi yi moshiketha shi yambule po opoloyeka,” Ndjuluwa ta ti.