Aanafaalama monooli oya pandula epangelo sho lya gwedha ko kuuwindji womambakumbaku galyo omasiku ngaka.
Aanafalama yomiitopolwa ya yooloka, oya kala nokwiindila opo omambakumbaku gepangelo ga indjipalekwe, oshoka ohaga kala inaaga gwana pethimbo lyokulonga omapya gawo. Epangelo nuumvo olya landa omambakumbaku ge li 350, moka ge li 168 ga gandjwa kuuministeli wuunamapya womwene, omanga ge li 182, ga andjanekwa kiitopolwa ya yooloka.
Omugandji gomauyelele muuministeli wuunamapya Jona Musheko okwa ti omambakumbaku ngoka okwa li ga landwa nelalakano lyokwiindjipaleka iilonga yuunamapya moshilongo.
“Omambakumbaku okwa li ga indjipalekwa omolwomaindilo ga kala taga ningwa okuza moshigwana, unene pethimbo lyoondima sho taya tameke okulonga omapya gawo,’’ ta fatulula ngaaka. Wilka Nangolo gwomomukunda Okafitu moshitopolwa shaMusati okwa ti oya nyanyukwa komambakumbaku ga gandjwa kepangelo okuyambidhidha miilonga yawo yomomapya.
Omambakukumbaku ngoka ohaga pulula, go taga kunu, taga tilehi uuhoho pethimbo limwe.
“Iilonga ya ningi iipu, itatu mono we iihuna yokulamba epya tatu kunu mokati komitenya. Ohatu mono iihuna okufuta omambakumbaku gomomikunda ngoka hage tu pula ondilo,” ta ti ngaaka.
Ta hokolola ta ti, omambakumbaku gwomomikunda otaga pula N$1 000 mohekita yimwe, omanga gepangelo taga pula N$250 mohekita yimwe.
“Otwa kuthwa muudhigu lela, paife otatu vulu okupulula omapya getu ga pwa ko, oshoka oshimaliwa tatu futu oshi hwepo,” Nangolo ta popi ngaaka.
Ta gwedha po ta ti, natango otaya indile uuministeli wu gwedhe ko komwaalu gwomambakumbaku, opo kehe gumwe a kale a mona ompito yoku ga longitha momukunda. Maria Newaka gwomomukunda Onaanda okwa ti, nonando ya kala nokuuva okuza kiikundaneki kutya ope na omambakumbaku ga gwedha po inaye ga mona natango. “Mboka taye ga longitha oyo aanelago. Kandi shi ngele inaga gwana natango, nenge ope na mboka haye ga longitha ashike,” ta popi ngaaka.
Ta ti, ondando yomambakumbaku gopaumwene oya londa noonkondo, mowili otaya pula N$650.
Saara Shoolongela gomomukunda Ehafo lyaKandenge okwa ti, omambakumbaku gepangelo ohaga kala uupyakadhi aluhe, oshoka ohaga kala taga kondjelwa oshoka kehe gumwe okwa hala oku lyi longitha omolwondando yago yi li pevi. “Ohashi kala oshidhigu okutegelela embakumbaku limwe lyi mane ko omagumbo agehe taga pululilwa moshikandjohogololo shimwe,” ta popi ngaaka. Shoolongela ta ti, oshikandjohogololo oshi na omikunda odhindji, na kehe gumwe okwa hala okupululilwa. “Shoka ohashi ke tu thimininika tu ka konge omambakumbaku gopaumwene ngoka ge na ondilo, gamwe taga pula N$600/650 mowili,” ta fatulula ngaaka.
Pehovelo Nainda gwomomukunda Oshikolongondjo okwa ti, okwi ishangitha okupululilwa kembakumbaku lyepangelo ohaku ya tokitha okulonga omapya gawo, oshoka omusholondondo gomadhina ohagu kala omule.
“Epangelo ohali tu pula ombiliha, N$250 mowili yimwe, moka hatu vulu okumona ompito yokupulilitha nando oowili mbali nenge ndatu, ihe inaga gwana,” Nainda ta hokolola.
Ta gwedha po ta ti, ndyoka lyopaumwene ohali pulula ashike owili yimwe oshoka oshimaliwa oshindji, itaya gwanitha oowili mbali nenge ndatu.
vkaapanda@nepc.com.na