Aanamimvo 19, Jerome Haragaeb oshowo Simon Shuuya oya kalekwa mondjendhililo noshipotha shawo osha undulilwa komasiku 23ga Aguste nuumvo.
Sha ikolelela kopolisi yaNamibia, aalumentu mboka yaali oya li ya longitha edhina lyehangano lyahahende a tseyika nawa moshilongo Sisa Namandje, miinima yiifundja.
“Aamati mboka yaali aalongwa kiiputundhilo yopombanda, gumwe oku li koLingua College omanga gumwe ta hiti koNamibia College of Opening Learning (Namcol). Oye na natango ehangano lyawo pamwe tali ithanwa Gure Trading,” tayi fatulula ngaaka.
Otaku hokololwa kutya ehangano lyawo ndyoka anuwa olyi na sha niilonga ngaashi okuninga oondhopi, iikulya, okututa omavi oshowo okugweha uumanya wuuwe.
“Oya kala nokulandula omahangano gontumba kutya oye lile koomeho ooproyeka ndhimwe dhepangelo,” tayi hokolola ngaaka.
Otaku hokololwa kutya oya kala taya ningi omayindilo okukalela po omahangano ga yooloka okugandja omayakulo kohi yehangano lyaSisa Namandje.
“Otwa lopotelwa woo aakalimo yamwe yomoshitopolwa shErongo oshowo Khomas ya ningi ihakanwa, noya li ya longitha ompito ndjoka yuulingilingi,” tayi ti ngaaka.
Tayi gwedha po kutya, kehe ngoka a ningi oshihakanwa moshingwanima shika na lopotele Sergeant Joseph Ndiliowike konomola 081 306 5585.
Opolisi oya indile wo oshigwana shi kale sha kotekela iiningwaima yoludhi ndoka, oshowo shi kale tashi kongo uukwashili tango, okuza koombelewa oonene dhehangano ndyoka.
Opolisi oya kala nokulopotelwa uulingilingi tau ningilwa oshigwana momukalo gokuyugwa iimaliwa oshowo iinima yawo.
“Aafuthi otaya longitha oompito adhihe okuyuga oshigwana iimaliwa, onkene oshigwana otashi londondhwa shi kale aluhe sha kotokela aantu mboka,” tayi kumagidha ngaaka.
Momushanga gwa pitithwa kuhande Namandje, okwa popi kutya ehangano lye, inali kala lyi li mekwatathano naalumentu mboka, ihe kehe shoka sha longwa okupitila anuwa mehangano lye kasha na uukwashili.
“Ehangano lyandje ohali longo pamulandu nokoompango, onkene kehe ngoka to ka tsakaneka oshiningwanima shi li ngaaka shi na oshihako shehangano lyandje, talela po oombelewa dhtu oku uva uyelele,” ta kumagidha ngaaka.
Ta ti, oshigwana nashi ikaleke kokule nokuniga iihakanwa miinima kaayi na uuyelele wa ihwa po.
– vkaapanda@nepc.com.na