Victoria Kaapanda
Opolisi moshitopolwa shaShikoto oya manga aalumentu yaali mboka ya adhika niingangamithi mohauto yawo mehuliloshiwike. Omugandji gomauyelele gwopolisi moshitopolwa shaShikoto Inspekta Ellen Nehale okwa ti oshiningwanima shoka osha holoka momundhingoloko Tsintsabis.
Opolisi oya ti, aalumentu mboka aakalimo yomoTsintsabis. Otaku hokololwa kutya aalumentu mboka yaali oyali ya adhika niingangamithi yoskunks’, mohatuto yawo yoToyota Corolla ya mangelwa moplastic.
Opolisi inayi totha mo kutya iingangamithi mbyoka oyi na oogalama ngapi, ihe oya ti ashike oyi li muupakete utatu. Opolisi otayi tsikile okukumagidha oshigwana shi hulithe po okulongitha iingangamithi oshoka oya nika oshiponga.
“Kehe ngoka ta ka adhika niingangamithi otaka pewa egeelo lye lya gwana,” opolosi ya ti ngaaka. Aanona oyendji oya thigi po oosikola, ya yi momapandaanda, omolwiingagamithi taya longitha.
Aanyasha oya hanagulwa po kiingangamithi, neilongo kaye na nalyo, oshoka oonkalamwenyo dhawo oyendhi tula miingangamithi. Opolisi otayi kumagidha oshigwana shi kale aluhe tashi lopota mpoka nenge ngoka ta landitha iingangamithi.
Tayi ti, aantu mboka inaya pumbwa okukala moshigwana otaya teyagulapo aantu, oya pumbwa okukala moondjedhililo. Opolisi oya kumagidha oshigwana natango kutya, itashi ka totha mo nando omadhina gaamboka taya ka lopota iiningwanima mbyoka, sho osho shoka oshigwana inashi pumbwa okutila sha.
– vkaapanda@nepc.com.na