Opolisi yaNamibia melongelokumwe naanambelewa yuuministeli womidhingoloko, iihwa nomapashiyono oya manga aalumentu yaali nomayego goondjamba.
Omugandji gomauyelele muuministeli womidhingoloko Romeo Muyunda okwa ti aalumentu mboka ya li ya mangwa nomayego ge li 15, oya kwatela komukunda Namandumo moshitopolwa shaZambezi, mehuliloshiwike.
“Aalumentu mbaka oya li pamwe naalumentu yatano, mboka ya li ye shi pondola okuya ontuku nomayego ngoka ya li ya humbata,” ta ti ngaaka.
Otaku hokololwa aalumentu mboka ya li taya zi koBotswana hoka taku fekelwa kutya oya li ya ka ninga uukongo waa li paveta, noya zi ko nomayego ngoka goondjamba. Muyunda okwa ti, okwa ndhindhilikwa kutya, ndjika onkalondjiigilile, Aanamibia taya taaguluka oongamba taya ka ikuthila ooveta koBotswana hoka haya ka longa iilonga yuulingilingi ngaashi mbika.
“Oshiwike sha zi ko natango otwa manga ongundu yaantu ye na omayego goondjamba 24 ta yi zi koBotswana. Omayego oya li ye ga kuthwa, e taga pungulwa,” ta popi ngaaka.
Ta ti, ethimbo eshona lya piti, uuministeli womidhingoloko nopolisi moshitopolwa shaZambezi, oya li ya tula uukuni kumwe opo ya tule miilonga okukondolola nokugamena iiyamakuti.
“Elalakano okugamena iiyamakuti, oshowo okutotha mo nokumanga po mboka taya longo iilonga mbyoka,’’ ta popi ngaaka.
Muyunda ota kumagidha oshigwana shi hulithe po okwiikuthila ooveta momake gawo yene.
“Kehe omukwashigwana na kale omupolisi kuye mwene, opo alopote kehe ngoka taka longa iilonga yoludhi ndoka amagwe po, “ta kumagidha.
Ta ti, omimvo dha piti okwali haya kwata aantu oyendji taya longo iilonga ya tya ngaaka, ihe omumvo nguka iipotha yoku ningila iiyamakuti omiyonena otayi ende yuuka pevi, nonando inayi hulithwa po thiluthilu.
Ta popi ta ti, monakuyiwa okwa inekela kutya oshigwana otashi ka kala shina euveko lya gwana, nokwiikaleka ko kule niingwanima yatya ngaaka.
Iiyamakuti oyi li moshiponga omolwa ongushi yiilyo yawo. vkaapanda@nepc.com.na