Olutu lwokanona komimvo ntano olwa adhika mondoloma yomeya konima okanona hoka ka kalanoku kongwa.
Opolisi moshitopolwa shaHangwena oya lopota kutya oshiningwanima shoka osha holoka esiku lyomahogololo, 27 Novomba momukunda Okambebe.
Otaku hokololwa kutya okanona hoka oka li ka thigwa megumbo nayakwawo omanga aakuluntu ya li ya ya komahogololo.
Okanona hoka anuwa inaka popya kutya oka li ka yi peni, yakwawo oya mono ashike ka kana po.
Aakuluntu sho ye ya megumbo anuwa oya li ya pula kutya okanona hoka oka yi peni, nokutameka taya kongo egumbo alihe.
Opolisi oya ti okanona kamwe ka li ka thigwa pamwe nanakusa oka li ka tondokele konima yegumbo, hoka kwa li kwa adhika olutu lwokanona hoka lu li mondoloma yomeya.
Opolisi kakwa li ya tseyitha edhina lyanakusa.
Moshiningwanima shimwe omulumentu gwomimvo 35 okwa si sho anuwa a lyatwa kohauto tayi longo momahogololo.
Opolisi oya lopota kutya oshiningwanima shoka osha holoka esiku lyomahogololo lwopotundi 21h00 koKaribib.
Otaku hokololwa kutya ohauto ndjoka yepangelo tayi longo momahogololo okwa li tayi zi koKaribib yu uka koWindhoek.
Opolisi oya hokolola kutya omuhingi gwohauto okwali ta shuna koKaribib nelalakano lyokufala ombaapila ya li
mohauto.
Sho anawa e li pokuthika mondoolopa yaKaribib, okwa mono omuntu ta piti opate sho ngeno a mbilike okwa toka nale, noku mu lyata ee ta si ethimbo olyo tuu ndyoka.
Nakusa okwa tseyika nedhina Hainghono Pandeinge Shapumba.