OSHAKATI – Iingangamithi oya teya ombili momagumbo gomundhingonoko gwOshakati nOngwediva nuunene momalukanda Okandjengedi, Evululuko nOneshila.

Yamwe yomaagundjuka, yeli yamwe yomaalongithi yiingangamithi kamana, oya hokolola nkene ya ningi iihakanwa shoka shaya etela opo ya yathige po oosikola, yamwe oya kanitha iilonga, omanga aakuluntu taya dhengagulwa momagumbo nokuyugwa iinima yawo kaanona yawo.

Rosalia Thomas, (edhina kali shi lyoshili) okwa ti, monkalo moka e li ina halela mo nande okanona komuntu, oshoka oya nyayika.

“Onda tameke okuhila ococaine, sho ndali nda tala ookume kandje kwali taye shi ningi, ndi wete onkalo kwali taye yi enditha nawa, nani onda itula ashike ondje mohema. Onda kanitha iilonga yandje, ohauto yandje ndjoka kwali nda thigulula kumeme, omolwa iingangamithi,” ta po pi ta kengelela omahondhi.

Omukiintu gumwe edhina lye li shiwike kuKundana okwa ti, oha landitha olutu lwe pontopa yOkandjengedi a mone oshimaliwa shokulya ye ta thigi po yokulanda ococaine ye.

“Sho tandi popi ngiika kandi na sha ongondhi ondeyi gandja po kwaamboka haya landitha opo ya pendje ndi ka hile oshoka ka kwali ndi na oshimaliwa,” ta hokola ngaaka.

Ta ti, “onkalo ndjika oya tula ndje muudhigu oshoka ohandi vulu okuya momilalo na kehe ngoka oshoka onda hala oshimaliwa”.

Ta gwedha po ta ti iilonga iteyi mono oshoka okwa thiga po osikola, kena onzapo ya sha.

Malakia Isak okwa ti okwa hila iingangamithi omimvo dha pita 10, ihe oye mu tula ashike pomutenya.

“Okwali handi hili iingangamithi yondilo, onda kanitha oshindji, ashike ongeleka yopambepo oya mangulula ndje,” ta popi ngaaka.

Omukulupe gumwe ha landitha okapana mOshakati okwa hokolola nkene onkalomwoenyo ye yili moshiponga sho ha dhengagulwa kokamwanagona, ka valwa kumumwayina, hoka ka pikwa kiingangamithi.

“Ohandi ningilwa omatilitho anuwa otandi dhipagwa, otandi dhengwa ngele itandi gandja oshimaliwa. Ohandi gandja ashike shoka ndi na po uuna nda landitha okapana kandje,” ta popi ngaaka.

Ta ti oha kala a tila mo megumbo na ngashingeyi okwa tokolo oteke shi tye ko kopolosi.

Pastoli Newaka Shikongo gwomOkandjengedi okwa ti aanyasha yomokandjengedi oya ningi iihakanwa yiingangamithi kashi na nee kutya omukiintu, omulumentu nenge okanona.

“Opolisi oya pumbwa okukutha onkatu okuhulitha po eshingitho lyiingangamithi moshigwana,” ta nyenyeta ngaaka.

Opolisi moshitopolwa shaShana oya ti iingangamithi oya indjipala unene moondoolopa nomomalukanda ngaashi Oshakati, Ongwediva nOkandjengedi, nonando natango taga dhumwa oshilongo ashihe.

Omukuluntu gwopolisi moshitopolwa shaShana Naftal Lungameni Sakaria okwa ti iingangamithi otayi landithwa momagumbo.

“Omasiku ga piti otwa manga po aalandithi yiingangamithi, sho kwali twaadha omagumbo gatano taga landitha iingangamithi mOshakati, Okandjengedi, Evululuko oshowo kOndangwa,” ta po pi ngaaka.

Sakaria okwa ti, mwaamboka ya mangwa po yaali aakiintu yaadhika taya landitha momagumbo gawo.

Ta ti, momwendhi gwaDesemba oya manga po iingangamithi yoCannabis yongushu yi vule N$100 000, tayi landithwa momagumbo.

Ta gwedha po kutya opolisi mOshana oya kala noku lopotelwa omwaalu gwaanona yosikola taya longitha iingangamithi moosikola tagu indjipala.

“Aanona yosikola otaya longithwa nokuhekwa kaalandithi yiingangamithi. Yamwe otaya pewa ya ka landithe koosikola. 

Oshinima shoka otashi teya po oonkalamwenyo dhaanona,” ta nyenyeta ngaaka.

Ta ti, opolisi oya kala nokwiindila oshigwana shi lopote aantu mboka taya landitha iingangamithi, opo ya kuthwe mo mokati kaantu.

“Otashi uvitha nayi, aanasikola taya longitha iingangamithi, pehala lyokukala ya itula momambo gawo, oshoka oyo oshigwana shokomongula, aantu mboka otaya teya po oshilongo shetu,” ta po pi ngaaka.

Ta ti, iingangamithi oyi li uupyakadhi mokati kaanona yosikola oshilongo ashihe.

Aalandithi yiingangamithi otaya longitha omikalo odhindji nodha yooloka okulongitha aanona yosikola.

 “Uuna aanona yosikola ya adhika niingangamathi, ohaya patulilwa oshipotha, ihe ohashi konakonwa, sha ikolela komimvo dhokanona. Haaluhe haya tulwa konima yekumba,” ta fatulula ngaaka.

Ta ti, opolisi ohayi kala mekwatathano naahungimwenyo, opo ya kambadhale okuhunga aanona mboka omwenyo, nkene ye na okuhulitha po okulongitha iingangamithi oshowo oku ya fatululila oshiponga shiingangamithi.

Opolisi otayi kumagidha aakuluntu ya kale taya lopota uuna ya mono aanona yawo taya longitha iingangamithi, opo yi vule okukwathela.

“Ota tu tsikile okuindila moshigwana shi kale aluhe tashi lopota uuna sha mono mpoka ta pu landithwa iingangamithi, tu vule okuninga etokolo lyomondjila,’’ ta po pi ngaaka.

Sonia Iipinge omuhungimwenyo oshowo omupangi gwomolukanda gwomolukanda Oneshila okwa popi kutya sho ha e nde nomagumbo ta gandja uyelele kombinga yuuhaku, oha tsakanene nuupyakandhi momagumbo.

“Aavali otaya tukwa kaanona ya hila iingangamithi, yamwe ohaye tu tidha mo momagumbo gawo anuwa ota tu pikitha aakuluntu yawo, aanona oya piyaganekwa kiingangamithi,’’ta hokolola ngaaka.

Ta gwedha po kutya oyendji mboka haya hili iingangamithi kaye li melandulathano, otaya landitha mo iinima momagumbo ya kalande iingangamithi yawo.

Iipinge okwa ti, okwa ndhindhilike kutya yamwe ohaya piyaganekwa pamandhilandhilo, shoka hashi ya fala ponkatu yoku ka longa iilonga inaayi uka, ngaashi omakwatonkonga oshowo omadhipagathano.

vkaapanda@nepc.com.na