Auleria Wakudumo
OSHAKATI – Ngoloneya woshitukulwa shaShana Hofni Iipinge okwa indila ovaleli vomoshitukulwa nookansela opo va yakule oshiwana nondjungu nokutwala exumokomesho kuvo.
Eshi ngoloneya okwe shi holola pefimbo ta unganeke oshoongalele osho sha li pokati kovaleli voshitukulwa nookansela onghela mOshakati.
Ngoloneya okwa holola kutya omutumba wa li ko oo wotete okudja nghene va hoololwa.
Ngoloneya okwa holola kutya omuleli muwa oye ou ha longo noudiinini okutwala omayakulo koshiwana noku na elalakano lokuhanga efindano laye.
Iipinge okwa ti luhapu ovanhu ohava kala nokuyandja ombedi komaliko noikwafifo inai wana ashike efimbo limwe hashoshili.
Okwa ti edopo ohali etwa kovaleli ovo vehe na owino ile vehe na noshiwana, okufaula koilonga, okuhalitula mo moilonga, okukwata nai omaliko epangelo nomeemhito dimwe ovaleli tava ningi oulingilingi nokulunga tave li tapula.
“Omaliko oshiwana oku li po naye taa nyangwa. Keshe odola ya kana molwa ouhasha, okuhakwata nawa, nena osha hala kutya omwa kufa mo oikulya yeumbo limwe, omiti doshipangelo ile ongulu yokulihongela yovahongwafikola tai fiwa ofika molwaashi oshimaliwa sha longifwa epuko,” Ngoloneya ta holola ngaho.
Iipinge okwa ti eembelewa depangelo inadi talikako onga eenhele omo ovaleli veya okufudapo ndele nadi talikeko onga eemhito odo ovaleli va pewa okuyakula oshiwana.
Ngoloneya okwa indila yo ookansela opo va xwaxwameke exumokomesho la kwatela mo avanhu aveshe. Okwa ti ovaleli nava tale unene ovakulukadi, ovanyasha oshoyo ovanhu ovo vena ounghudi. Ta ti moshitukulwa shaShana oshina ovanyasha vahapu vehena oilonga.
“Ovanyasha vahapu inava hala okupewa ashike oilonga nokanya ile ya nafangwa ndele ova hala eemhito omo tava dulu okuninga yo ovayandji voilonga monakudiwa.
Ovanyasha ova hala okumona eewino mounangeshefa, nomoinima ikwao,” Ngoloneya ta ti.
Ngoloneya okwa denga yo omufindo pefimano lokulonga oikulya. Okwa ti oshiwana hashi longo oikulya yasho vene ihashi kwatwa kodjala nokoluhepo.
Iipinge okwa ti ombelewa yaye otai ka kala hai ningi omakwatafano noshiwana keshe komwedi opo va kundafane, okuuda omakemo oshiwana, okutala exumokomesho leeproyeka doshiwana nokukwshilipaleka kutya exumokomesho ola hanga keshe oshikandjohoololo moshitukulwa.
“Onda didilika kutya omeva, omaumbo, oudjuwo, eepate, omayakulo opaunamiti nehongo onghene tai twikile okukala omhumbwe moshiwana,” Iipinge ta ti ngaho. Iipinge okwa ti oinima imwe ei ohai etwa kokuenda kashona keeproyeka odo da pewa eetendela dokulonga.
Ngoloneya okwa indila oikondo aishe yepangelo opo i longe onga elyenge limwe. Iipinge okwa ti ova pumbwa okulongela kumwe shaashi oshiwana ihashi tale kutya oshikondo shilipi ngeenge tashi yandje ombedi.
Okwa ti oshiwana ohashi yandje ashike ombedi kepangelo ndele hakoohadimwe.
Ookansela ova indilwa op ova longele kumwe opo va yandje oidjemo iwa koshiwana. Okwa ti oilonga yavo iwa inai talika komitumba dihapu odo va unganeka ndele nava tale kutya ova eta elunduluko lashike moshiwana.
-awakudumo@nepc.com.na