OHANGWENA – Ongundu yaakalimo yomoHelao Nafidi mOmaandaha oya li ya tameke okuhupa omuthima gwomeya sho elelondoolopa lya ndopa oku ya pa omeya okuza mo2003. Mbaka aakalimo lwomolukanda lumwe ndoka taye lu ithana Ohangwena Proper.
Omupopiliko gwawo Lukas Mbabi okwa li a tseyithile Nampa pethimbo taya hupu kutya konyala omagumbo ge li 200 kage na omeya ga yela konima sho elelondoolopa mo2003 lya li lya tete ko omeya kuupomba utatu woshigwana mboka wa li wa tulwa po kepangelo lyuukoloni.
“Inatu kala nomeya we okuza mpoka, onkene ohatu longitha ashike omeya ga kaka ngoka yhatu teke popepi,” Mbabi ta ti, ta gwedha ko kutya aakalimo ohaya futu N$4 mendini lyoolitela 25 opo yam one omeya okuza koohandimwe. Ta popi wo kutya elelondoolopa olya pata uupomba mboka utatu omolwa oondjo, oshoka aakalimo oyendji kaye na iilonga na itaya vulu okufuta omeya nenge ya tulithe omeya momagumbo gawo yene.
“Otwa li twa pula elelondoolopa li patulule okapomba konale yo ye ye po nomukalo omupe gwokufuta, ashike elelo inali shi ninga oomvula adhihe ndhika,” Mbidi ta ti.
Ta ti sho elelndoolopa lya ndopa okupatulula okapomba nena kaye na we nkene kakele kokufula omuthima. Mayola gwondoolopa yaHelao Nafidi Eliaser Nghipangelwa okwa li a koleke okwa koleke kutya aakalimo yamwepo otaya longitha omeya gomomithima momalukanda gawo sho oopomba dhawo dha li dha patwa.
Nghipangelwa ta ti elelo kalya li tali vulu okufuta NamWater nokwa ti oya hala okuya po nomukalo gokulanda omeya. “Omupya omunene omukalo gwokufuta tango ogu na ondilo nelelondoolopa kali na oshimaliwa mompito ndjika,” mayola ta ti ngaaka.