Uunona wu li une owa si omanga aantu ye li 188 ya taambelwa moombete molwa omukithi gwomanyutu moshitopolwa shaHardap.

Aantu mboka 188 ya taambelwa moombete yena omukithi gwomanyutu oya kwatela mo aakalimo yomondoolopa yaRehoboth ye li 109, aakalimo yomoMariental ye li 62, naakalimo yomoAranos ye li 17 pokati kaJanuaray naNovember 2024.

Uuyelele mbuka tawu tilitha owa piti molopota noku kondjitha iiponga yopaushitwe yoshitopolwa shaHardap ndjoka ya ningwa kokomitiye yopaliamende yina sha nuuthikepamwe wopaukakwashikekookantu, ehumokomeho lyoshigwana, oshowo iipambele yoofamili.

Oku gwedhela kuudhigu womukuthi gwomanyutu ngoka gwa kwata ko oshitopolwa shaHardap, iikunino oya kukuta oshoka oopomba dhomeya ita dhi matuka we naanafaalama oye li momalimbililo moshitopolwa shoka.

Ondama yaHardap ndjoka yi li popepi ngashingeyi oyi na ashike omeya oopelesenda hamano sho osho sha thiminike ehangano lyoNamWater li pate manga omeya goku tekela iimeno opo aantu ya kale nomeya goku nwa pethimbo ndika lyoshikukuta.

Oshiwike sha zi ko omagumbo gamwe moshitopolwa shoka oga ningi omasiku kaa ge na omeya goku nwa.

Maria Elago, oshilyo shokomitiye ya zi noku tumbulwa okwa dhenge omuthindo kesimano lyoku kwatathana noshigwana moku kondjitha omukithi gwomanyutu. Okwa indile iipangelo yomoshitopolwa kaa yi tegelele epangelo momakwatho ashike na yi tameke uukunino opo yi ete po iikulya yi kwathele moku kondjitha omanyutu.

“Aakalimo nay a kambadhale oku longitha oonzo ndhoka ye na miitopolwa yawo ndele eta ya kutha ombinga muunamapya nuuniimuna oshoka ota wu kwathele mekondjitho lyomukithi gwomanyutu. Uunamapya nuuniimuna ita wu kwathele ashike niikulya ndele ota wu kwathele aantu ya kale yiithikamena,” Elago ta ti.

Omanyutu oha ga kwata omuntu ngele ihaa li iitungithi yolutu ya gwana nenge he yi li sha pitilila.

Mekondjitho lyomanyutu, aavu ayehe ya monika omukithi ngoka oha ya pewa iikulya ya longekidhwa nale yi na iitungithi yolutu ayihe mboka ya pumbiwa ya thikile ta ya li.

–mndjavera@nepc.com.na