Kae Matundu-Tjiparuro na Jata Kazondu
OTJOMUISE
“Riruako Katuutire mwa kwatasana? Mwaza pamwe mo vyo mbazu? Yarukee pamwe, ripakee, unguree ombunguhiro imwe, yatee pozonganda, ripuree tjitjarara navi , posee pamwe ovyombazu tjivyeya haamee pamwe,” ingaa oo mambo Ombara ya Etanga Katjambia Tjambiru ngari amatena movanane aveyevari imba nandakuzu vemuyerere nawa.
Ongondjero yOmbara Tjambiru okuhanganisa Ombara Otjitambi Kuaima Riruako nOpresidenta yo DTA, Katuutire Kaura, mo ruhaho nduvenaro yambirire. Omunwe ombara Tjambiru waurike mo mitanda vyo Nudo nungwari mbuheri outi wambeto. “Ovanatje vo Nudo vahiti mwami? Ametje vendjihwe omani. Vendjiyeka omunane wOvaherero kukuheri koveta ya Riruako omuni kokutja ongwapanda. Eye wendjizuvere nu nomwatje ingwi omukwendjandje Kaura wendjizuvire nu. Nungwari ehungi randje kaverizuvire ngamba,” Ombara Tjambiru watjere erero omuhuka omunene momapitisiro kombepo womurari wOtjiherero, Keetute.
Ombara Tjambiru wa nangere ovanane aveevari imba kombongarero yapeke Oritjavari po komando oku hungirira kohange, oupanga noruwano pokati kovanane aveyevari imba. Tjahungirire kuna o Nampa komurungu wombongarero indji Tjambiru watjere ohepero oku hungira kumwe oku zengurura ondjakaha ndjiripo nai pokati kovanane aveyevari imba noku kotora ohange, ongamburiro nondengero mombazu nongaro no vitjitua vyo muhoko wOvaherero. “Metjiwa kutja kave hungire kumwe mena rohani yopolotika. Ongaro pokati kao ombame nu ihi tjituna kOvaherero avehe,” Ombara Tjambiru omuni nguri okanepo ko DTA watjere. Waraerere o Nampa kutja wazire koye ko Kaoko okuye kuhungira kuna ovanane imba nu kanaa yaruka nganduu ndjatona mongondjero ye. “Kavesere okuyandjera oumune wao wapeke wotjipolotika nombindu yao ombi yopolotika okurirunga mombazu poo oku honapara mongaro novitjitua vyo muhoko. Riruako ombara nu Kaura okanepo okahenendu kounane wombazu yOuherero nu mevanga kutja pekare nao,” Tjambiru watjere. Kaura na Riruako vaitaverere oku kara pombongarero indji. Nungwari ondando yombara indji kanaa yaenenisirwe tjinga Ombara Otjitambi ayahindire otja komazuvira oruhindo kehi yOmuhona Kandjanatazombua Tjiho okuhakaena kuna Ombara Tjambiru. Ombepo ndjimaihingi minda tjiva maimunu kutja Ombara Otjitambi kairi pondondo imwe mounane wombazu puna omutengwa Kaura nu munao Ombara Otjitambi otjiihasere okuhaama mombongarero indji no puyahindire oruhindo kehi yOmuhona Tjiho.
“Oporotika kainaa yari noo Tate. Katuyii. Ete tuyii ombazu kutja omwatje karu naihe vetjururwa iyombazu. Akuzu mwatje kako. Hakayenee nai, hakayenee nai. Tuupee omihunga vyo kuhakaena tjimwaru. Tjivaru omunene no mwangu vetjururwa iyombazu. Oporotika kaitjurura omundu indu aina ovizeze, ndji tjirura ombazu,” Ombara Tjambiru wazirire nao kepura kutja mahakainisa vi Ombara Riruako nguri ombara mombazu no munane Kaura woporotika. Watjere tjauta otjihavero tjaihe nambano tji tja tukuturwa nu tjitji tukuturwa aavaza Riruako na Kaura po komando averi pamwe amavehiti mondjuwo imwe. Tjakaza kEtanga wee kuvaza omundu auhe ee ritungira okaruwo ke.
Kuye otjarira otjikumise kutja Riruako una okaruwo ke nu Kaura una okaruwo ke. Watjere ouruwo imbwi owo porotika orondu kaveri imba pevesire puvari pamwe naye. Omukova we otja tjiwasana kuwasana oongarero mombazu nu otjimakondjo okukotora ombazu movanatje natja oporotika ngaisewe ketambo. “Otjina tjimwe tjitjihwa ovandu enova, tjovizeze tjitjihina owatjiri mbutjihungira. Indjombazu kaikora ovizeze ihungirwa owatjiri,”Ombara Tjambiru watjere.