Opolisi oyi li molukongo lwaalumentu yaali yomaalumentu yaheyali mboka ya adhika nomayego gompanda moWindhoek.
Oshiningwanima shoka shuufuthi anuwa osha holoka koGobabis moshitopolwa Omaheke.
Omupopiliko gwopolosi yaNamibia Kauna Shikwambi okwa ti, aalumentu mboka oyaadhika nomayego gompanda taku fekelwa ga tetwa kompanda ya dhipagwa ‘kuwalye’ koGobabis, omasiku ngaka.
Ta ti, Michael Shomeya Koshondatile (39), Barnabas Shitaleni Muzanime (35), Victory Henghono (31), Imanuel Stafanus Nangwasha (34), and Petrus Petrus Nghifindaka (31), oya holoka mompangu yopevi yaKatutura noshipotha shawo osha undulilwa komasiku 13 Aguste nuumvo.
Shikwambi okwa hokolola kutya aalumentu mboka oya mangelwa moWindhoek molukanda Havana nomayego gompanda omatalala sho kwa ningwa oshikonga meendelelo koBlue Rhino Task Team (BRTT) oshowo kaanambelewa yuuministeli womindhingoloko.
“Sho kwi istuwa ompanda ya dhipagwa, okwa tamekwa oshikonga sho meendelelo. Aakwashigwana koGobabis oya lopotele opolisi kombinga yohauto yina onomola yepangelo ndyoka yali ye ya tula momalimbililo omolwa omayinyengo gawo,” ta ti ngaaka.
Ta hokolola kutya ohauto ndyoka oya landulwa sigo ompaka pena omuhingi, sigo ayehe ya mangwa.
“Ondjembo ndyoka ya longithwa okudhipaga ompanda ndyoka inayi monika natango,” ta gwedha po ngaaka.
Opolisi oya ti otayi tsikile nomakonaakono.
Uuministeli womindhingoloko owa kala tau kumagidha oshigwana shi hulithe po uulunga wiiyamakuti ya gamenwa.
– vkaapanda@nepc.com.na