WINDHOEK-Aakwashigwana ye li yatano oya kanitha oomwenyo dhawo ombaadhilila omasiku ga yooloka pethimbo lyomatango omanene gaPaasa sho iihauto moka ya li ya londa ya kandoma e taya si.
Oshiponga shotango ooshoka sha ningwa mOlyomakaya ga ziko, sha ningilwa pondjila yedhina Onamutai-Adolf popepi noNamutai moka mwa sile omukwiita gwetango lyegameno lyaNamibia Lukas Nambwanga, nomonamati Olavi Nambwanga noshowo omuholike gwe Theresia Alfeus.
Sha ikololela komulombo gwopolisi ngoka hagu holola iimbuluma niiningwanima ayihe moshilongo ngoka gwa tuminwa aatoolinkundana, Nambwanga okwa hokolola a kanitha okondolola yoshihauto shoka a li ta hingi e tashi kandoma nokwa hulithile poshiponga mpoka , ihe omona nomuholike gwe oya hokololwa kutya oya sile koshipangelo kOshakati hoka ya li taya mono uuhaku womeendelelo.
Moshihauto moka okwa hokololwa kutya omwa li mu na aantu yahamano moka yatatu ya hupu moshiponga noye li taya mono uuhaku moshipangelo shepangelo shaShakati.
Oshiponga oshikwawo osha li sha ningilwa mondjila yaUsakos naKaribib sho omulumentu gwepipi lyomimvo 44 William Duncan McNab a ndopa okupangela oshihauto shoka a li ta hingi e tashi kandoma, nokwa sile poshiponga mpoka.
Okwa hokololwa kutya nakusa okwa li mo oye awike moshihauto ethimbo lyoshiningwanima nokwa hinga ashike oshinano oshifupi lela okuza moUsakos. Nguno aniwa okwa monika ashike mOsoondaha ongula komuntu ngoka a li ta ende pehala mpoka. Aakwanezimo ye oya tseyithilwa oshinima shika nomakonaakono gwopolisi otaga tsikile.
Mesiku omo tuu moka omulumentu gwepipi lyopokati okwa si sho a lyatwa koshihauto shoka kashi shiwike ee tashi fadhuka po she mu thiga mpoka e li monkalo ombwiinayi.
Nguka aniwa okwa li a kuthwa po komunamutimahenda ngoka e mu fala pomboloka ihe okwa si ashike pethimbo ndyoka a thiki mpoka.
Oshiningwanima shika osha ningilwa nduno mondjila yaKamanjab naWerda pomukunda gwedhina Marinhohe mOlyomakaya.
Omanga mEtitano lyoshiwike sha zi ko omulumentu gwomimvo 51 Titus Makili a si sho oshihauto shoka a li a londa sha kandoma sho omuhingi a kanitha okondolola, ndele tashi galangata.
Okwa hokololwa kutya moshihauto moka omwa li mu na aantu yahamano, aakuluntu yaali naanona yane. Sho nduno osheenditho shoka sha kandoma osha tema omundilo ashike omuhingi naanona oya hupithwa koontaliyiho ihe Makili okwa pila mo. Aakwanezimo ye oya tseyithilwa oshinima shika nomakonaakono gopolisi otaga tsikile.