Paulina Ndalikokule
Omalutu goonakusa ye li yatano mboka ya hulitha moshiponga oshinyanyalithi ookilometa 40 okuya kOshivelo ohela oge li monautalala yaMuthiya, naapambele yawo oya tseyithilwa nale.
Oonakusa oya tongololwa onga Magdalena Ruanda omukiintu gomivo 58 ngoka a li ta hingi, Martha Samuel (47), Reinhold Ronnei (18), naElizabeth Ruanda (5) mboka ya sile poshiponga manga Bravo Simson (12) a hulithile koshipangelo shepangelo moTsumeb.
Yatutu yalwe mboka nayo ya li mosheenditho moka oya ahamekwa unene notaya mono uuhaku moshipangelo shepangelo shaTsumeb.
Omukuluntu gwopolisi moshitopolwa shaShikoto komufala Teopoline Nashikaku ngoka a koleke oshiningwanima shika okwa hokolola kutya ohauto ndjoka yali ya humbata aantu mboka yahetatu oya li ta yi hingwa okuza koWalvis Bay okuya kOndangwa sho nakusa omuhingi a nyengwa okupangela ohauto ndjoka ontokele yoNissan ookilometa 40 okuthika mOshivelo koongulasha dhokupendukila ohela.
Nashikaku okwa kumagidha aayendanandjila ya longekidhe omalweendo kuyele opo ya yande okuhinga ya loloka nenge taya kotha.
“Nonando iiponga yomoondjila ihayi pewelwa aantu uusama, otatu indile ngeyi opo aantu ya kale haya hingi kuyele opo ya kale ye wete ko nawa yo taya hingi ya vululukwa,” Komufala ta ti.
Moshinigwanima sha yooloka olutu lwanakusa gwomivo 13 Elia Ndeutapo goludhi lwaayelele olwa hilwa mondungu yomeya kaakwashigwana yomomukunda Evale moshikandjohogololo shEengodi pombali yomutenya mOsoondaha.
Nashikaku okwa hokolola kutya nakusa anuwa okwa zile megumbo ngaashi shito momukunda Oshikondilwa a ka tale omeya kEvale.
“Sho anuwa ya thiki pondungu yomeya, Ndeutapo okwa ikundu nooyakwawo oye a ye koshipundi shi li kongodhi a ka pinde omeya mondungu manga yakwawo taye mu nana mo nongodhi ngaashi haya ningi shito. Otaku fekelwa kutya yakwawo anuwa oya nyengwa okupangela ongodhi ndjoka molwoshiviha shaNdeutapo sigo ye etha ongodhi yi gwile kohi yondungu,” Nashikaku a ti.
Otaku hokololwa kutya nakusa okwi idhenge momamanya, ta ehamekwa komutse nokuhulitha. Olutu lwaNdeutapo olu li momake gopolisi konautalala yaMuthiya naapambele ye oya tseyithilwa nale.
Moshiningwanima shilwe sheso momukunda Omunyekadhi moshikandjohogololo Nehale LyaMpingana, otaku hokololwa kutya Martha Nakake (34) okwa adhika i imangeleka miihwa popepi noshigunda shaandjawo shiimuna.
Nashikaku okwa ti anuwa omukiintu ngoka kwa popi omutenya gwOsoondaha kaanona kutya ka li u uvite nawa ta yi koshigunda. Anuwa okamonagona sho ka mono kutya okwa kala ko, oke ke mu konga noka adha i imangeleka.
Nakusa ina thiga po omukanda gwasha.
-ndalikokulep@gmail.com