Omukuluntu gopolisi moshitopolwa shaShana komufala Naftal Lungameni Sakaria okwa ti omadhina goonakusa ya atu ya dhipagelwa moshikunino shiinamwenyo mEtosha itaga vulu okutseyithwa.

Sakaria okwa ti aalumentu yatatu ya yahwa sho anuwa kwa li ya yi moshikunino shiinamwenyo shaa li paveta oya ndhindhilikwa Etitatu kaapambele yawo.

Aalumentu mboka oya yahwa kaapolisi Olyomakaya ga zi ko, nakakutukomatanga gopolisi moshilongo Joseph Shikongo okwa pititha omushangwa moshigwana ta pula ngele ope na mboka ya kanitha aapambele yawo. 

Shikongo momushangwa gwokiikundaneki okwa li a holola kutya aalumentu mboka oya li ya dhimbululwa kutya oye li mEtosha sho kwa li kwa monika oompandhi dha pita dha ya moshikunino shiiyamakuti, sho kwa li taku ningwa opatolola. “Olyomakaya aanambelewa taya gamene Etosha oya li yi itopola moongundu mbali, noya yi molukongo. Aafekelwa mboka anuwa oya li ya tameke oku umba aapolisi sho ya ndimbulula kutya oye liwe mokashoko,” a shanga ngaaka.

Ta ti, nonando ya li ya taambathana okuyahathana, kape na nando omunambelewa gwaamboka taya gamene oshikunino a monithwa oshiponga.

Shikongo okwa nyola kutya aafekelwa mboka oya li ya adhika noondjembo ndatu, nayimwe yo muyo kayi topa ngele tayi yaha.

Shika oshikando oshitiyali nuumvo aanambelewa ya gamena oshikunino shiiyamakati taya yaha aantu taya si mEtosha.

Omasiku sho ga li ga 1 Mei nuumvo aalumentu yaali oya li ya yahwa nokusa  kaanambelewa taya gamene ehala ndyoka.

Natango otaku hokololwa kutya aafekelwa mboka okwa li ya tameke okuumba aanambelewa.

Petameko lyaAguste nuumvo sho kwa li kwa ningwa oshigongi kombinga yokwiikuthila ooveta okuya moshikunino shiiyamakuti mOshitopolwa shaShana omukuluntu gwopolisi moshitopolwa shaShikoto Teopoline Kalompo-Nashikaku okwa popile kutya otaya ka umba kolutu nokudhipaga aayikuthiliveta mEtosha. 

Nashikaku okwa tile ngele tashi ya kaafuthi mboka, opolisi itayi ka umba nande pomunkulo oshoka aantu mboka haya ningi uukongo waa shi wopaveta nayo oya nika oshiponga noonkalamwenyo dhaakeleli yiiyamakuti odhi li moshiponga wo.

“Aantu mboka haya ikuthile ooveta okudhipaga iiyamakuti ya gamenwa ohaya kala ya homata, onkene itatu ka gandja ompito yokuumbathana nayo,” Kalompo-Nashikaku ta ti ngaaka.

Okwa tsikile kutya sho ya kala taya patolola mEtosha sigo omwedhi ngoka Aguste, oya ndhindhilike mo iipotha yedhipago lyoompanda yi li 30 omumvo nguka ashike. 

Ta ti, aakeeleli yiiyamakuti oye shi pondola okudhitika aantu 42, noyi itsu momahinga goompanda ga thika po60 mEtosha. –vkaapanda@nepc.com.na