EENHANA-Aantu ye vule 50 oya iigandja kongundu tayi pangele mOlyomakaya, pethimbo lyoshigongi oshinene shoka sha li kEenhana.

Yaali ya kwatele komeho ongundu yaantu mboka oSam Hamunyela ngoka kwali omuleli gwongundu yaashanya moRally for Democratic and Progress (PDM) oshowo omuhwahwameki Stefanus Pombili.

Pombili esiku ndyoka okwa gandja ombili komuulikwa presidente Netumbo Nandi-Ndaitwah oshowo kongundu yoSwapo sho anuwa a kala no kuyi popila muuwinayi.

“Onda hala okugandja ombili oshoka onda kala handi po pi nayi ongundu yoSwapo no nda hala ndi taambweko onga okanona kongundu tayi lele Swapo,” ta indile ngaaka. Esiku ndyoka Pombili okwa kumagidha aanyasha aakwawo ya landule ongundu ndyoka yili moshili, Swapo.

Ta gwedha po kutya oongundu dhilwe dhoompilameno otadhi gandja omau vaneko giifundja oshoka odha hala ashike okukalya.

“Natuyeni mehwata tuka hogololeni omuulikwa presidente gwetu Nandi-Ndaitwah momasiku 27 ga Novomba,’’ ta kumagidha ngaaka.

Hamunyela naye okwa kumagidha oshigwana shi landule noku ka hogolola ongundu Swapo oshiwike tashiya mEtitatu.

Nandi-Ndaitwah okwa popi kutya ombili ohayi panga, onkene okwa taambako ombili ndyoka ya gandjwa kuPombili. “Otandi pandula kehe gumwe a galukile kongundu Swapo nena, onduuvite nawa lela. 

Okuza nena indeni muka longe mwiitulamo e ta mu uvithako oshigwana shika hogolole ongundu yili mondjila, Swapo’’ ta kumagidha ngaaka. Amushangandjayi gwoSwapo Sofia Shaningwa okwa pandula ayehe yali yiigandja, omanga taya pewa uukalati wiilyo yoongundu hoka ya zi.

“Uukalata mbuka otandi keu gandja kooyene. Naamboka inamu wu e ta natango, inamu wutuula po nenge mu wu ekelehi, ihe wu gandjeni nombili,’’ ta kumagidha ngaaka. Shaningwa okwa ti, kehe ngoka natango a landula ondjila ya puka,  inaku toka natango okugalukila kegumbo.

Ta kumagidha oshigwana kutya momasiku 27 gaNovomba, oshigwana nashi ka hogolole mondjila, inashi hepeka nando ombaapila yimwe sho nashi shange nawa. –vkaapanda@nepc.com.na