Aantu ye vule po50 oya thingwa powala sho oombashu dhawo dha pi po komulilo mehuliloshiwike molukanda Havana koWindhoek.

Epeko lyopolisi lyiiningwanima ya holoka mehuliloshiwike olya hokolola kutya oshiningwanima osha holoka lwopotundi 15h00 mepandaanda tali ithanwa Oshakati.

Omulilo anuwa ogwa fike po oombashu ndhoka thiluthilu, no inaku shuwika kutya ogwa etwa koshike. 

Opolisi oya lopota kutya nonando oshigwana sha kala nokukambadhala okudhima omulilo ngoka inashi pondola sha, kadhimamulilo sho a ka thika oombashu odha pya po nale.

Nonando aantu mboka ya pilwa oombashu dhawo ya pewa ehala lyopakathimbo kaakwashigwana,oye na uutile kutya pamwe omvula tayi ka ponoka ko e taya lokelwa po.

Opolisi oya popi kutya omulilo ngele gwa tameke okufika ombashu yimwe ohagu taandele mbala okuya koombashu oonkwawo, shoka hashi eta oombashu odhindji dhi pye pehala limwe. Oya kumagidha wo oshigwana shi kale tashi kwata nawa omililo nokukwashilipaleka kutya omulilo ogwa dhima uuna ya mana okuteleka nenge okuminikila osho wo okugu longitha. 

Sha ikolelela ku-NBC, kansela gwoshikandjohogololo shaMoses ||Garoëb Stefanus Ndengu, anuwa okwa kwashilipaeke kutya oye li metifa okuyambidhidha mboka ya fikilwa oombashu dhawo.

-vkaapanda@nep.com.na