Omhangulilo yaMangestalata mOhangawena, oya tula po efiku loku yandja ehandu komuhongifikola woipupulu Fransina Mwetufa.
Omunamido Mwetufa 27 okwa monika ondjo komhangu oshivike shadja ko nokwa teelela a pewe ehandukilo laye mEtine loshivike eshi.
Mwetufa oo kwali ha longele kofikola yedina Limbadungila Combined School, i li moshitukulwa shaHangwena, okwa kwatelwe po momudo 2021 konima eshi a kendabala oku dipaa omulongi pamwe naye wedina Hilma Iindingo.
Otaku hokololwa Mwetufa a shinga ohauto yaye noku ya moixwa yopopepi omo a ponokela Iindongo nombele.
Konima eshi Iindongo a patululila Mwetufa oshibofa, ouministelu wehongo owa tameka oku mu ningila omakonaakono, noku mona kutya okwa kala ta longo needjapo doipupulu.
Otaku hokololwa kutya omukainhu ou okwa konga oilonga nodjapo yoHonours Degree ta i kulike kutya oku na ouhongelwe wokulonga eendodo dopetameko ashike mboli oipupulu ke na sha shili odjapo yokulonga ofikola. Mboli Mwetufa okwa xulila ashike moGrade 10.
Kakele koibofa oyo ivali, okwa li yoo a patululilwa oshibofa shi na sha noulunga woimaliwa ifike poN$6 500, komavalulilo ombaanga yomukulunhufikola pofikola a li opo ha longo.
Eshi a holoka momhangu yamangestalata moHangwena, Mwetufa okwa monika ondjo moibofa – shonghendabala yedipao omo vati a twa omuhongifikola pamwe naye nombele nomwaashi shoumbudi.
Omafiku aa okwa monika yoo ondjo kOmangulilo yaMangestalata mOshakati molwaashi vati a kengelela pamukalo woku landulula okahauto kokaPolo kali kaye nale ndele ta yandje oumbangi womafutilo oipupulu.