Zebaldt Ngaruka
Epukiro- Vana farama monomukunda dokulisiga siga moEpukiro moOmaheke region kuna kumona udigu omu yikasama yomowiza yina kudipaga yimuna yawo nkenye ezuva. Esi sina kara sihorokwa sokuhulilira kuna kara nye pomuknda gwaOtjinotjiua, omu muna farama gedina Venoumba Mbarata kazumbanesere yikapa yendi yokusika ko 15 momazuva gatatu koyikasama eyi yinapilire kudivikwa. Koruha nye rwaOngootura koOyinjuru kuna kara nye evango limwe lyedona unene oku yina kara yikasama oyo morwa kwakarako hena asi mema kupita tupu. Mbatara katente asi yikasama eyi kuna kukwata yimuna yetu masiku, ngesi ayo unene kuna kukwata yikapa(Nonzwi).
‘’Eyi kuna kara yomutaro dona, ose katu kambadarere kusana yikasama eyi tuyidipage, nye kapi kayitutompokere. Ose kapi twakara noyikasama yangesi kugusako tupu vambanze napa nopena, nye oyo hawe twadiva omu atuyigendi,yimo ana kutanta ngoso. Yimpagwa yangesi kuna yimona nyue mvhura ezi ponomukunda dokulisiga siga ngwendi Otumbonde, Otjimanangombe, Okovimburu, Okombomi, Ramoro, Otjombundiro ntani Otjijarua nayimwe ngoso. Yikasama yomowiza novambanze ngoso oyo kugendagura tupu mowiza kuna kureta nye udigu kovanafarama noyimuna yawo. ngwe nehumbu nayo yimwe yakara ponomukunda edi, nye ayo kumoneka unene nsene asi rukukutu runa karako. Mbatara kagwedereko asi age ngesi kuna kara tupu asi tatwara yimuna yendi kovamusinda vakara koOzombouvapa yipo walye nayikaparuka.
‘’Ose kurara kosinyongo masiku nagenye tukunge yimuna yetu. Nye ame ngesi nakona kutangura koyirugana koGobabis, nye nina kara nowoma kusiga varugani vange velike noudigu wangesi, yimo ana kuyididilika. Epuro asi age nye kakarapotere udigu wangesi kovawoyawapera kuyirapota, age katente asi kayigeve tupu kovakarelipo unsitwe. ‘’ Ame kanivapukwilire apa ninayasiki oku, nye awo kuna purange asi sinyongo sange ure waso ngapi, ntani ngapi omu nina kukambadara kupopera yikapa yange. Nye kavatumbwidilire kuwiza kevango lyange vayatare, nye dogoro ngesi kwato kapi vana yasiki ndi kutunde Yuma koruha rwawo. Ame ngesi kuna kugazara kutwara yimuna yange koOzombouvapa, morwa nahepa hena kutengura koyirugana,’’ yimo ana kutanta muna farama ogu yinagumu unene. Epuro asi nompadi nye doyikasama eyi kumoneka ngapi, Mbatara katente asi udigu unene kuyitanta, morwa age gadiva nompadi doyikasama eyi yakara nare momukunda.
‘’ Ame kapi nina hara kugazarera, morwa nompadi doyikasama eyi kapi nayimona rumwe. Varugani vange kavatanterere nge asi awo kavamwene yikasama yomaruvara gomanzi-eyi kagazarere asi nampo ehumbu. Age katanterere mutjangi mbudi ogu asi kozili nyama zimwe yina hupisapo, nye age kuna kundindira nye kovakungi nsitwe vamutantere asi yinke narugana nonyama ozo. Ose tuna gwanako yimbilingwa yimwe eyi tuna hara kuyalikida kowo vana kuwiza. Evango eli Otjinotjiua kwakara nokilo 13 muzogo gwaOzombouvavapa ntani kwalikundama no Otjihaenena monzira zokuza koOmbaue. –zngaruka@yahoo.com