OKALONGO-Siruwo oso vamwe kwakara tupu asi yindongi kuyiwekera kupurura ntani simwe sougendero,mugara gonomvhura 53, gombunga zaSWAPO age kwatokora asi yindongi yendi gahepa kuyidwareka yikoverero yoruvara rombunga zendi zaSWAPO. Mugara ndi kamarada ogu gapura unene mombunga zendi zaSWAPO,kwatunga pokamukunda Oneheke momukunda horowero Omusati. Murugani kosayitunga zaNew Era kakadingwire mukunda gwaOneheke ogu gwakara mosintokorwa Etayi,moOmusati mezuva lyomapenda gaNamibia, age yipo kakakere momukunda gwina nokumona asi koyili yindongi vanadwareke mudwaro gombunga zaSWAPO mononsigo dayo. Mokuturamo nye makonakono, vatungi momukunda yipo kavatanterere munambudi ogu asi mwenya yindongi eyi murongo nayine mwene gatokora kutwareka mudwaro gombunga zaSWAPO.
Festus Mwetupunga, gadivikwa asi “ Dungu” katente asi egano eli kwatameka mo 1989, konyima tupu apa sirongo esi sagwana emanguruko mo1990, eyi gamona age asi mpito zimwe omu navaninkisa mbunga zendi zaSWAPO zefunde mahoroworo.Mwetupunga katente asi age gumwe govarwi varwire novanyengi monad zosirongo pokatji kaNamibia naAngola, yipo gakere taru nonomburu. Ano ngesi age gumwe nage gomukwayita gwanare ana kugwana mauwa aga vana kugwana varwi vanare wombunga zaSWAPO. “ Konyima zonomvhura 1989, mbunga mpatanesi unene zaDTA, ngavamanga koyitji marembe gawo. Ano ose kapi ngatu yimono ureru kulya enyango lina kara kositji esi vana manga erembe lyombunga zaDTA. Ano melikwamo lyangoso kwatwaredera vantu wovanzi vakalipakerere kombunga zaDTA”. Ano name yipo nye natokora asi nahepa kudwareka yindongi yange mudwaro gombunga zaSWAPO, yipo ava vana kara noutjirwe vahepa kuyalipakerera mombunga ezi zaSWAPO, navavapukire vahepa kutengura.yimo ana kutanta ngoso.
Yindongi yendi kuna kara nomadina gomapenda ngwendi Ndjeke Nopuundjuu, Kafinana Kaandili na Mashina (gwo Kolutenda), varuka ndokotora Moses Amweelo rail way. Mwetupunga kwayidiva nawa-nawa asi nepu natwareka yindongi yendi ruvara rombunga zaSWAPO, hawe vantu navenye tavalipakerere mombunga ezi nava vadukiremo vahepa kukatengura. Nye kuna kumoneka asi egano lyange kwakurugana morwa navenye ava vatundire mombunga zaSWAPO, ngesi kuna kutengura apa vana kumona yindongi yange yinadwara ruvara rombunga zetu. Awo kuna yimono asi noyindongi yeeyi vaSWAPO, yinke nye ngomuntu nani pilira kukara name mombunga zaSWAPO? Nampili ngano asi yindongi eyi kuna zumbana, hawe ureru kuyigwana morwa kuyidivira koruvara omu yina dwara. Pwarumwe apa ayizumbana kuza ure dogoro moAngola ndi konomukunda dokoure makura ame tanizi koradio nokugava mbudi asi kuna kupapara yindongi yange yina kara nomudwaro gombunga zaSWAPO, hawe nare vana yikavenda.
Yindongi yange kumororange nsene asi taniyimorora,yimo ana kutanta Mwetupunga. Age simpe katente asi kundindira dogoro sindongi sendi sina siki nomvhura 18, ntani nye ana kusidwareka mudwaro gwaSWAPO. Epuro kalikere asi yinke yimwe hena aruganesako koyindongi yendi, age katente asi kupurwisako nsene siruwo sokuroka mvhura.Nsene asi nina mono asi mvhura kuna kuroka nawa,noyindongi yange yina hafa yina wapa,ame kuza nye ure mosirugana mokukayiranderako marembe gomape morwa yina rugana nawa.yimo ana kuhagesa esanseko lyendi ngoso kosayitunga zaNew Era.