WINDHOEK- Yisupa yomapenda vamwe vakondjera sirongo esi saNamibia, tayiyasiki mungura moWindhoek. Kombungagona ana kugendasa Ministera gonomukunda, nepangero lyonomukunda nomambo nekuliko nomukunda doponze zodoropa, Major General Charles Namoloh tavakareta yiokora eyi yoPutuse Apollus na Linekela Kalenga eyi vakavhumbura mosirongo saZambi mokwedi kwaKudumogona mvhura zeezi. Ministera govarwi vanare wombunga zaSWAPO, ndokotora Nickey Iyambo,nkera kayinkondopekere asi yousili varwi vanare ava mungura povili zomurongo yisupa yawo tayisiki pokapare konodira kaEros moWindhoek. Yisupa yovanakufa ava tayisiki moWindhoek moune ngurangura. Ngakukara silika nye kapi ngasikara ngwendi sikwa esi twakere naso kokapare kaHosea Kutako, morwa esi somungura hawe evango nare lina wapa kapi lina kumoneka asi kuna kara nosilika sosinene. Yiyo nye asi ngatukara poEros ano vantu kuna kuvahundira vahepa kuwiza vayatare asi ngapi yina kuyasika yisupa yomapenda getu aga. Apollus ogu gakere asi yiwo vamwe vazire ponze sirongo gomukadi gokuhova, silyo sombunga zovakadi vaSWAPO, ntani kwakere mokomitiye zontjima-ntjima zaSWAPO. Age kwakere mukarelipo govagolikadi vaSWAPO, mombunga zouzuni zovakadi komeho akatusige mo1986. Apollus simpe hena ngarugana mondango zovakansela modoropa zaLusaka, moZambia monomvhura 1970.
Kalenga ogu tuna kugazara asi kwadogorokere mo1981, kwakere hamutjanga gerongo mombunga zaSWAPO, ntani silyo sontjima-ntjima zombunga zaSWAPO. Epangelo mokwedi kwaApril kwatumine mbunga zovanamberewa kosirongo saZambia, mokukakarapo apa vavhumbwire yisupa yovanakufa ava Kalenga naApollus. MwaMay, kokapare kaHosea Kutako International, vakarelipo novantu navenye kwakapongere vakatambura yikora yomapenda aga, Eneas Peter Nanyemba, Walde Homateni Kaluanje, Isack Shikongo, Natalia Ndahambelela Shikangala Mavulu na Auguste Nghaamwa konyima tupu apa yisupa yawo yatundire nye mosirongo saAngola. Mapenda gavali aga mbira zawo nago vadi tara vakere asi nonkwate koRobben Island nawo kwavadimburura ndi asi melikwamo yina kara vakakadimburure. Iyambo kwatente asi epangero kuna hara kukareta yisupa yovantu navenye ava vazumbanesere nomwenyo dayo mosiruwo sokukondjera sirongo esi sikamanguruke, nsene asi nontoko dawo dina moneka. Yousili esi kuna kara situmbukira setu ngepangero asi navenye vakere moumpitisili siruwo sina nye kwakadogorokera mosirongo peke, twahepa nsene kuvhura kureta yisupa yawo mosirongo. Nsene kuvhura kudiworoka pwanapiti siruwo, mavango aga vavahoreka kapi gakere asi mayendo nawa-nawa, yipo asi kapi sina kara sirure asi mayendo aga tugagwane noureru. Yimo ana kuyahulisa ngoso ndokotora Nickey Iyambo.