Wokukona kona honde zokutara asi ogu sili munoge omu yina kara asi mugazarerwa ogu ogu Moses Aubery Salele, gakwaterere vakadi vavali kononkondo mokwdi kwaPembagona 2020, simpe kapi vana mana makona kono gangoso yimo ana kutantera mupanguli kompanguro zonene moVenduka nkera Philanda Christiaan. Mukarelipo gepangero Palmer Khumalo katanterere mupanguli Christiaan asi nampili ngomu yina kara ngoso koruha romakona kono kolabolatory, yitundwamo yangesi simpe kapi yina pwaga, nokutanta asi ngesi navayitura nye pelikwamo pangenderera yipo asi yipwe sinkwa ntani yimo ana kutanta.
Hahende gwaSalele, Enos Mwakondange, nage kaligwire kumwe asi vahepa kumana makona kono gangesi.
Christiaan yipo nye kageve erondoro lyokuhulilira asi dogoro mokwedi kwaMurongankuru 2024, vahepa kumana. Salele kuna mutamba makuye negazarero asi kwatezere nzugo moVenduka koGoreangab kevango vatura asi lyokutunga mokwedi kwaPembagona 2020, omu nye gakakwaterere vakadi vavali kononkondo. Age kwamugwene pokutameka mpangura zendi asi kwato epuko garugene.
Mwakondange, ogu ana kukakarerapo muntu ogu kupitira moruha ronoveta, kankondopekere ehundiro lyangesi. Asi muntu gwendi age kuna kundindira tupu epangero liture umbangi poruzera. Kuna kumoneka asi age Salele namukwawo ogu ana kara asi kapi ana divikwa kwatezere zowo vaturamo erapoto, makura tavavalike mauta nonombere makura tavakara nawo panyama. Simpe kuna kuzuvhika asi kwagusire vanyandi owo funguna zawo.
Ogu nye vana kugazarera asi kwagendere naSalele kapi vamukwata ano age Salele kuna kupatana asi age kapisi yige gayirugana, ndi asi gakere monzugo ozo kumwe nogo mukwawo.
Mokukwama nye mwendi omu ana kulimburura gepangero, age ngazigida mukwawo zendi gedina Ndamona Hijalulwa, ogu ngayagava umbangi ana diva asi tauyamupopere. Salele katente asi age kuna kugazara kutuliramo sirapotwa mininstry zosafety and security nsene ngavamutokwera morwa kuna kuyimona asi kwamukwata pwahana veta nokumuzedilira.
Mokukwama nye vakonakoni asi awo vana kara noumbangi kovasivani asi Salele yige vadiva ogu gavaterere mukwawo ogu vana pilire kudiva.
Age kuna mutamba maumbondo 13, omu muna kara kuteza embo negano lyokukakwatera kononkondo, yikando ntambali yokukwatera vakadi kononkondo, kulika muntu uta, ntani simwe mahaka. Salele ngesi ponze ana kara kwalifutiramo.