Liluko la njimo lilemuhile butuku bobunca bwa lubasi lwa butuku bwataku ni mulomo mwasikiliti sa Zambezi. Temuho yabutuku bobunca bobuzibahala ka0, itoloka libaka kuambalakana kwabutuku hakusiala kupahami, nihakubonahala kuli mupendo uzwelapili, likwambuyu Calle Schlettwein nabulezi. “Lipatisiso mwalabalatoli libonisize kuli kuna ni butuku bobunca, bobuzibahala ka0. Kukala la 9 Muyana lapili mwanaha Namibia, nabulezi mwandu yamilao. Naize lipatisiso zene ezizwe hala butuku bobunca, lisupeza kuli bunengekwa kwabutuku bobuswana bobuli mwanaha Zambia, bone buswelwi mwahala 2018 ni 2021.
Kasamulaho akulemuha bukutu bobunca, liluko neli lekile malotoli amilyani alikana 340 000, kateko yelikana bolule basilezi (N$6 million), kupenda likomu mwasikiliti sa Zambezi. Milyani nefitile la 17 Muimunene, mi liluko lipatehile kupenda likomu. Lipatisiso zaliluko libonisa kuli butuku nebukeni kuzwa mwanaha Zambia, bakeñisa sa balimi babalekanga ni kusilisa likomu isi kamulao mwahala sikiliti sa Zambezi ni naha Zambia. La 28 Kandao liluko nelikile la swala butuku bwa taku ni mulomo kwamunzi waKasenu, mwasilalanda sa Kabbe ya Mbowela mwasikiliti sa Zambezi.
Kuzuha kwabutuku nekunyatezwi mwalabalatoli la 3 Mbuwana.
Kuzwa kweli ya Kandao likomu zemwanda kazemashumi aketalizoho, libihilwe kuli lishwile bakeñisa kukula butuku bwa taku ni mulomo, ili bobutisa kufela mezi mwamubihi ni tala.
Kakuli likomu halikoni kuca, kunwa mezi kapa kuzamaya bakeñisa litombo zebutuku kwamulomo ni litaku. “Mupendo nokalile mi uzwelapili, kamulelo wakupenda likomu zelikana 170 000 mwasikiliti sa Zambezi. Balimi basusuezwa kuisa likomu kwalipango zeli bukaufi. Litaba zakubatisisa kubona sinyehelo yetisizwe kibutuku lizwelapili mwaupa wasikiliti sa Zambezi, mi likomu ni nama lihanisizwe kuzwa ni kukena mwasikiliti sa Zambezi,” nekubulezi Schlettwein.
Miseco yeketalizoho iezizwe kwa Kongola, Liselo, Bukalo, Namalubi ni Kalumba kubata kuhatelela taba yakusa zamaisa likomu ni nama.