Likwambuyu wa Njimo, Mezi ni Canfazo ya Mubu Inge Zaamwani Labulalu na zibahalize kuzuha kwa linzie zetuta za Afirika mwa sikiliti sa Zambezi. Nazibahalize mwa Ndu ya Milao kuli libaka zetaselizwe ki zecwale ka Kasaya, Nakabolelwa, Luhonono, Bukalo, Kabbe, Muyako, Masokotwani ni Linyanti.  “Nibata ku mi lemusa kuzuha kokutuna kwa linzie zetuta za Afirika mwa sikiliti sa Zambezi,” nabulezi

Likwambuyu naize libaka za mabala amuunda zecwale ka Muyako ni Masokotwani ya kale kona zetahisize hahulu kuambalakana kwa likokwani ze, kakuli lilemuhile kuba kona kolizwalela hahulu likokwani zeo. “Linzie zeo seli tulaka ni kufufa, ili kutisa butata tuna kwa babeleki baluna baba lilwanisa,” naekelize.

Zaamwani naize likolo lilumezi likwata zetalu bazamaya ni limotikala zetalu za mufuta wa Land Cruiser, ni limotikala zesupile zetamelezwi minshini ye faela fahalimu. “Ku ekeza ku zeo, likolo likupile limotika zeñwi kwa mutayi obona za mipendo ya likomu, kono kuzuha kwa linzie kutokwa swalisano yetuna,” natalusize.

Likwambuyu nakupile ma ofesi amubuso, katengo ka sikiliti ni katengo katolopo, ni maofesi akwamukunda kuswalisana mwa kulwanisa kuzuha kwa linzie. “Lu susueza cwalo ni likhuta zaluna za sizo ni sicaba mwa libaka zetaselizwe kutokomela, kungelela cwalo ni kuambuka kuswala linzie ze faezwi mulyani mane nikusa lica,” nakupile.

Zeo halili cwalo muinasipula wa katengo kasikiliti sa Zambezi Matengu Simushi nalatuzi lipiho zakuli sikiliti sa Zambezi sitalimana ni kuzuha kwa linzie kokunca.  Naize kufaela kokusweli kuezahala kikuitukiseza feela kakundongwama linzie zendondozi kuzwelela kwa mai ane azwezwi litabula leli felile, hamoho cwalo ni linzie zefufa kuzwelela linaha zeli bukaufi. “Hakuna kuzuha kwa linzie mwasikiliti sa Zambezi. Likwata lisweli kufaela kakuli linzie lindondozi, kukona kuzuha cwañi linzie haiba hakuna masimu acezwi?” abuza.

Nahatelezi kuli kakuba muinasipula wa sikiliti uziba lika kaufela zesweli kuezahala mwa sikiliti. Nihana latula kuzuha kwa linzie naize sikiliti sa Zambezi si mwakozi ya kutasezwa ki linzie. Kufaela kwanako yacwale kumwalibaka zefumaneha mwa mabala amuunda ili Kasaya, Nakabolelwa, Luhonono, Bukalo, Kabwe, Muyako, Masokotwani ni Linyanti. Kasepo yakuli kueza cwalo kuka tibela kuzuha kwa linzie balimi haba itukiseza kulima masimu abona.