Malarias ǁhōn ge buruxa ǀgaub !nâ ǁgôahâ ǀawas ǀkharigu !nâ. Nē ǂhôas ge dīhe ra xūn ra dī sîsenǂuib ǂurusib !harib aibba ra hā-ū. 

Malarias di !gôagu ge Omusatib, Oshikotob, Ohangwenab tsîgu !nâ ǀgapi !gôagu ǀkha ra ǂharose nē kurib di tsoatsoas !nâ !nurihe hâ is khao!gâ tsîs nēsa kai ǂâiǂhansensa ǂurusib mâisan !nâ gere ǁguis khao!gâ. 

Nē kurib !Khanǀgôab di 10 tsî 16 ǁaegu kha ge Oshikotob tsî Omusatib hâkha 20 tsî 21 malarias !nae!khaide ge !nuri hâ i. 

Ohangwena ǀkharib ge ǁnā ǁaeb !nâ ǀgui malarias ǁhō-i tsîna ge !nuri tama hâ i. ǀHaob ain ge ǂoa ge kurib !nâ 23 khoena malarias xa ge ǁō, ǁnāpan ge 4 356 malarias ǁhōna ǂoa ge kurib di ǂNūǁnâiseba xu Ohangwenab, Omusatib, Oshikotob tsî Oshanab hâgu !nâ a !nurihe hîa. Ohangwenab ǀkharisi ǂurusib direkteri, Odon Nkongolob ge ge mî, !kharu ge !nona wekhegu !nâb malarias !gôaba mûmûsase 60% xu 75% kōge ge ǀorosa. 

Ohangwenab di !gôagu ge ǂoa ge kurib di ǂNūǁnâiseba xu 3 831 ai ǀhaohâse mâ, ǁîna xun 697 ǀaeǁgâugu !nâ ge ūǂgāhe tsî hû khoena a ǁōse. ǀAsa !nae!khain ge nēpa a ǀkhai. 

Omusatib ǀkharisi ǂurusib direkteri, Alfons Amoomob ge !khō!gâ tsî ge mî, amabes !nâb, malarias !gôaba ǀgaisase ra ǀorosa, ai!âkam khoraǂuisendi ǀkha i kara ǀgoweǀnōhe soab ai. 

“Nēsisab ge malarias !gôaba ǀgaisase ǀoro hâ, ǂguros hîa da ge 500 !nae!khaidi malarias dide wekheb !nâ gere !nurib khamis ose,” tib ge ge mî. Nausab !khâikhom tsî gere mî, ǀnanu ǁaeb khao!gâb ǁkhawa !gôaba a ǀgapi ǁkhā !khaisa hîa. 

ǁŪǁgoehâ ǁgamgu ge ǀûitsîn ǁora!khaib ase hâ. 

ǀNanuǁaeb !nân ge ǀûitsîn !upuna ra ǀapibēhe tsî ǀûitsîna ǁaerob ǀgaiba ra ǁgoea-ai tsî nēs xa ra !aromahese malarias !gôaga ra ǁgôaxa, xawe ǀgui timî tsîb ǀnanuba ra bēs tsî ǀûitsîn ǁkhawa !upuna ra ǁgoe-aitsoatsoas. 

Tsî nēb ge ǁaeb malarias !gôagu ǁkhawa ra ǂharoba,” tib ge Amoomoba ge mî. 

Malarias ge kurikamagu īse ra hā tsîb ge direktera ǀhûhâsiga gere ǂgan, hoaǁae ǂhomisase tsî ǂkhaigari malariasa ǁkhaubas xūn ǀkha nî hâse īsa. 

Oshikotob ǀkharisi ǂurusib direktorats di danab, Alfons Nghipangelwab ge ge mî, ǁîn ge 196 malarias !nae!khaidi ǀguide a !nurisa, xawen ge ai!â ge ǂoa wekheba xu 20 !nae!khaide ǀguide ūhâ.