TSOAXUBAMS- Erongob ǀkharisi mûǂamaos, Nathalia ǀGôagoses ge !khâikhomsa ge dī, ǁnā khoen hîa ǂhanuba xun ǁkhâkorobe ra !khō!oa huiga ra hîǀhuruna !oa. 

ǁÎs ge mîs ge, ǁnā khoen hîa nē maride ra hîǀhurun ǁnāti ī !aorosasib nē marisihuiba ǂoa!nâs diba aitsama ra !aromasa, ǁîs ǀguis khami ī xū-I xa ǁkhaehe tamase aoǁguiba a dī ǁkhā, nēti marisihuiba ǂgae-oahes diba amaga, hanas nē marisa ǂâibasenbahes hâ !aromadi !aroma sîsenūhe tama nî īs karao. 

ǀGôagoses ge nēsa ǀgūǁaes ge ūhâ i ǀkharisi gowaǀîs !nâ ge !gāsa kai, ǂhanub ra mā ǁkhâkorobe marisihuib di ǂâibasens ǂkhawusa ǁanin ǀhûhâsib dina ǂkhâs ai hâ tsîs nē marisa ǂhanu tamase ǂauxûib tamas ka i o ǀhubuǀhubusenxūn ǁnaetigu ai a sîsenūhe ǁoa !khaisa. 

Erongo ǀkharib di !gôagu ǁnā khoen hîa ǂhanusi maride ǁkhâkorobe ra !khō!oan di !gôagu ǀarosen hâsa, ai!â ge !kharu marikurib ǀkha i ra ǀgoweǀnōhe o. 

“Nē marisihuib ge ûiga unus ai hâ. Nē maris ge ǀgôana ǂûma, kairana kō!gâ tsî ǁnān hîa sorosi !nubusina ūhâna ra ǂkhâ!nâ. 

Sada ge nî ǁawoǁawo nē maris ǁîs di !uru ǂâibasens ai ra dīoaǀoa !khaisa. Hana ta ǁnāti ī !nuri-e nî !khō!oa nē maris ra hîǀhuruhe !khais disas kara, O ta ge ǁnā !ereamsa tani hâ ministeris ǁga nî xoa îs nē marisa ǂgae-oahe. Nē maris ge !khari!khōs, ǀhubuǀhubusenxūn, tamas ka i o hîǀhuru-ūs !aroma hâ tama hâ. 

Marisihuib !aromas ge ǁnān hîa ra !khō1oan di tsēkorobe ûiga !gâi!gâis ai hâ tsî ǁîna hîgagas di ǂâibasens ai māhe tama hâ,” tis ge gere ǀkhomaǂgan. Kairan nē marisa ǁkhâkorobe ra !khō!oan di !gôagu ge Erongo ǀkharib !nâ 15 456 xu 16 779 kōse ǂharo hâ, sorosi !nubusina ūhâ khoen di !gôab 3 738 xu 4 526 kōse ǂharo hâ hîa. ǁKhōs !aroma ra māhe huib tsîn ge 416 xu 914 khoen kōse ǂharo hâ. ǀGôan hîa ǂhanuba xu ǁkhâkorobe ra domdoren ge 12 277 xu 13 047 kōse Erongob !nâ ǂharo hâ. ǀHaob aib ge ǂhanuba Erongob !aroma N$363 miljunsa nē !kharaga !âgu !nâ māǂui hâ. ǀGôagoses ge mîs ge, ǁîs nî hoa hû ǁhûi!nâǂharidi Erongob di di !nâ komitede !amǁaresa nē maridi sîsenūsa kō!haras ase. 

“Tita ge hîǀhurus xa ra !gû !nuri-e ta nî !khō!oas karao, o ǂhâbasa dā!harode nî ū,” tis ge ge mî. 

Ai!âs ge mîs ge, ǁîs di beros nî ǂōrisase ǀhûhâsigu ǂgaeǂgui-aon ǀkha sîsenǁaresa, ǁawoǁawos nēti ī marisihuigu ǂhanu khoen tawa ra sīs ǀguis ose, xawes nē marisa khoen ûigu !nâ ǀkharaǀkharasiba ra hā-ū !khais tsîna ǂans ase.