Algeriab di !Hūǂnûǁkhaeba-aob Namibiab ǁgab, Andelkrim Diafi ge ge ǂanǂan, ǁîb !hūb nî marisihuiba Namibiaba māsa, nē ai!gûgaru ǀkhurub mâsiba oe-ams ase ge dīhe ǂgans ai. 

Nē mîmâis ge Algeriab 70ǁî kurixas ǁâudīb ǀAeǁgams !nâ ge ǂoa ge wekheb !nâ gere tsēdīheb tawa ge ǂhaitsi kaihe. Diafi gere mîsa !oa i ge ǁnā ǀkhamasa !gaeǁares nē ǀgam !hūkha ǁaegu hâsa Algeriab presidenti, Abdelmadjid Tebbouneba ge ǂgaoǂgao!nâ, !Hūb di ǁûb Nangolo Mbumbab di marisi ǂkhâ!nâs aihâ ǂgans, îb Namibiaba ǂkhâ!nâ, ai!gûgaru ǀkhurub mâsiba oresa hōbas dis !oa. 

Algeriab tsî Namibiab hâkha ge gaxuse !goaxa !gaeǁaresa ūhâ, !hūb!noras ai!âba xu !goaxasa. 

“Algeriab hîa !kharaga!nâgu ǀgaugu ai huiba Namibiaba ge māb, ǁîb di !norasasiba ǁgâiǀāba xu hōs !nâb ge, Swapos berosa Algiers !nâ ge ūhâ i tsî ǁîsa ǂguro !apudi ǁîn toro!khamaon xa gere sîsenūhena a māsa. ǁKhātib ge Algerieba !hūǂnûǁkhaebasa Namibiab ǁga gere sîǂui, aitsama mâbasens !khamsa !hae!haes ase,” tib ge Diafa gere ǂâi-oa. 

ǂAnǂandi ministers Emma Theofelus hîa ǀō-aisa ǁkhauǂuisabes ase ǁnā ǁâudība gere ǁhao!nâs ge gere mîs ge Algeriab ǂgiǂgosi ǂkhâ!nâs, huiba mās tsî ǁkhāsigu !nâ-ū Namibiaba ǁāǁās tsî !naua!noexase Namibiaba ǀkhurub mâsiba oresa hōbas !nâ !khoe-ams, ge ra ǁgau mâtikōseb Algeriaba Namibiab ǀkhab ūhâ !gaeǁaresa !gamse ǂgaob !nâ tanihâsa. 

ǁKhātis ge nē ǀgoragusa !nae!khais Algeriab tsî Namibiab hâkha ǁaegu hâs ge aitsama ǁawosasiba mâibasens tsî !hū!nāsi aitsama mâbasensa a ǀgaiǀgaisa, !gōsase ǂâisa khoesi ǂhanugu ai ra mâise. 

Ministers ge noxopa ge mî, Algeriab di sîsenǀgaub hîa khoen ai a !ammâisab, ǀomkhâis tsî omkhâisens dib ra !gû-ǁaresa, !gomsigu hîan Saharab Huris tsî Palestinab khoena ra !kharu!nân ǀkha. 

“Nēs ge ra !aroma hoa !hūkha !gâiba ǁgūbasa ra aimâi tsîb nēpa xu !gâiba ra !huisa.