ǀUIǂGANDES – ǁAnǂgāsaben ǀUiǂgandes din ge ǁîn di ǂkhîo!nâsiba gere gowaui, īǁoasa tama mâsigu hîan ǀnaib ǀgâba nē !āsa !khō!nami hâ hîa ra ûi!nâgu ǂnamipe. Nē tsâsib ǁîn dib ge New Erab ge ǁnā !āsa sari hâ i soab ai !kharaga ǁanǂgāsaben xa gere !khō!gâhe. 47 kurixa Piet Matroosi ge gere mî, ǁnāpan ǁaupexa 80%gu xa a !nāsa khoena a sîseno tsî ǁnā ǂkhariron hîan kaira khoen di pension marirode xu ra hōna xu ra ûi tamas ka i o ǂhanub ra mā ǁkhâkorobe marirode xu ǀgui ûi hîa. “Hoarahus ǀgaub hîats nēpa sîsen-e a hō ǁkhās ge, nē tamas ka i o nau ǂkhari sîsenrona ǀgūse ǁgoe !garo!ādi tawa dīs tamas ka i o ǀnîsi i ga daoga !gâi!gâi!nâs sîsen-e a hâ osa. ǀNî !gâi!gâ khoen ge ǂhanub berodi, !ās !nâ hâ ǂharugu!khain tsî sekuritaitn ǂnûiǂgādi tawa ra sîsenna,” tib ge ge mî. ǁÎn ge !hū!âde māhe ǂgao tama hâ in ǁom!khaina ommâi. “!Nāsa kairan hîa !hūde ge ūhâ in tsîn ge ge ǁōǂoa, ǁnāpan ǁnān hîa ūhâna !hōde omkhâi tama hâse hâs ǀguisa īse, xawe da ge sida ǂhâb !nâ hâda a hōbasen ǁoa,” tib ge Matroosa ge mî. Noxopab Matroosa gere mîs ge “!Nāsa omdi nēpa mâdi ge Ministeris Kai!ā tsî !Garo!ā Omkhâis dis xa a ǀhonkhoe-aihe Build Together proxrammi !naka. Nē omdi ǂganǀgaub ge N$75 000 ai mâisa, xawe sida ǂganǀgauba a sī ǁoa !khais xa ra !aromahese ǁan!nâhe tamase mâ. ǂKhôab nē omdi ai ra dīheb ge daodi tsî karanda ra khôaǁnâhe tamas ka i o ǂkhôahesa, tamas ka i on ge ra !nariǁnâhe. New Erab ge !oabadi hîan ǀUiǂgandes !Garo!ā ǀAwemā!nans xa ra māhedi ǂnamipe gere ǂan ǂgao soab aib ge ǁîba ge mîba, !hau!hausasen noxopa ûi!gau hâ kairakhoena !nâbǀgaib ose noxopa Riversides, Gobebfonteins tsî Swellendofs !nâ ûihâsa. Nēsib !gâi ǀnanuba go ǁnā soab aib ge Matroosa ǂgaeǂguisa ra ǂgan, in ǁgoes ǀguisa hî hâ !hū!âdi, !khomn tsî ûitsamaxūn ǀkha huihe tsî ǀasase tsoatsoa tsî ûi ǁkhā. 27 Kurixa Ricardo van Wyki ge gere mî, ǂkhamkhoen asen -îna nē !ās !nâ !goaxa ǁaeb xa a !hoa ǁoasa. “Sida ge sekondere ǁgau!nâsa dītoa tsî !gangu !nâ ǀgui tsēkorobe ra hâma. !Nāsa ǂkhamkhoen ge ǀhubuǀhubusenxūn !nâ !â tsî ǂhanu tama ǂkhawadīb ǁaxasin !nâ gui ra hâ, dīn nî xū-i a ǀkhai amaga,” tib ge ge mî. ǂNūǂgoaes !nâ ǀguis ǂKham khoen ǁkhāǁkhākhâis sentersa mā !khais ge ra ī, -ǁîn mariosib !aroma ǁnā !ēde a sîsenū ǁoa !khaisa.