OSHIKUKUS – Mariǁhōn ministeri, Ippumbu Shiimib ge ra mî, ǂhanub noxopa ǁîb ǁguiǂgāsensa sâuǁkhāsib ǀomkhâis Namibiaǁîn dis ǂnamipe ūhâsa, ǂharugun ǁgauǂuidi !nâ-ū. Shiimib ge nēsa ǁîba gere ǂnûǁkhaeba mâisa-i !nâ-ū ǂhanuǁî ǁkhowa-ams, !nonaǁ-î !nās ase ge ǂnāǁnâ Oshikukus Kurikorobe ǂHarugu ǁGauǂuis tawa, ǂoa ge wekheb di Denstaxtsēs ai nēsa ge mî. Nēti ra ūhâhe ǂharugub ǁgauǂuidi ge !ēsa ǁgauǂui-aon tsî ǁama-aon tsîn hoana ra mā, ǁkhāsiba !khōǂgā hâ xū-i ǀkha tsēs ǀams ai nî ǁaruse is disa. 

“Tita ge ǁnā-amaga hoado ra ǂgan, nē !ēsa ganganxa ǂgaogu ǀkha !khō!oa tsî nî ǁ-awoǁ-awose īsa, Oshikukus Kurikorobe ǂHarugu ǁGauǂuis nî kurikorobe kai tsî !nāsa khoena ǂgaehāsa, tsîn ǁanǂgāsaben tsî nauna nî mûǂui, sao ra kurib di ǁgauǂuis !aroma ǁkhawa hāsase, ǂoa!nâ ǂgao tama is turab ǀkha,” tib ge ge mî. 

Shiimib noxopa ge mîs ge, !gâi!gâi!nâsa tsî ǀasa ǁkhoreba mās ǁguiridi ra sîsenǂnuwis ī-ǁkhāsigu, ǀaro!nâsa sâuǁkhāsib ǁ-axasin tsî hoan xa !nāsase, khoen ûiga !gâi!gâisa. “ǁNā-amaga a ǁgariǁgarisa !khais ge, nē ǂharugub ǁgauǂuis hoada xu ǂhâbasa ǂkhâ!nâsa nî !khō!oasa î da nēs !nâ-ū ǀhûǁarebese sada sâuǁkhāsiba omkhâi tsî !ā!nāsi ǂharuguna ǂnuwi,” tib ge ge mî. 

ǁÎb gere ǀgonǀgon!gaos ge, ǀhû-ǁarebe  sîsenǁareb !nâ-ūs Oshikukusa ǁguri-aona a ǂgaehā ǁkhāsa tsî ǁnās !nâ-ū sîsenga ǂkhamkhoen !aroma ǂnuwis daode ǀhui-am, ǀhûhâsiba ǁāǁā tsî ǂgaoǀkhāsa !oabade māsa. Oshikukus di !ā!khōmai-aos, Julia Endjambis gere mîs ge, ǂharugub ǁgauǂuis !nâ-ūs oshikukusa !ēde ǁguiri-aona ra ǂnuwibasa, !kharaga !âgu !nâ ǁguiris !aroma în nē gaub !nâ !ās di sâuǁkhāsiba omkhâi tsî ǁanǂgāsaben ûiǀgaugu !nâs tsîna ǀkharaǀkharasiba ǂgâxa-ū. “ǀGuitimî tsîb sâuǁkhāsiba nî ǀomkhâis kara, o da ra ǂgom!gâs ge, !nāsa !ēdi ǂharugutsoatsoa-aon tsî sîsenmās !nâ nî hâsa hîa ǁanǂgāsaben tsēkorobe ûiga nî !gâi!gâi!nâsa,” tis ge ge mî. 

!Ā!khōmai-aos ge !âǀhuru-aon, ǁgauǂui-aon tsî ǁanǂgāsabena gere ǂgan in tā ǀû nē ǁgauǂuisa ǂkhâ!nâsa, !ā!khōmais di ǀawemā!nans kurib !nâ nî hâ ǁaxasin di ǁkhâǂkhanib !nâs ra saomâihese. Nē kurib di ǁgauǂuis ge ‘Oshikukus ra !ēde ǂnuwi sâuǁkhāsib ǀomkhâis !aroma’ ti hâ ǂgaiǂams !naka ge hâ i tsî !kharu go wekheb Satertaxtsēs ai ge !gûǀam.  – Nampa