Matheus David

Ministeris ǁGau!nâs, ǀKharaǀkharasin, ǂKhamkhoesib, ǂGamǂgamsenǀhurun, ǂNuwi­khāsib tsî !Hao!nāsi ǁNaetin dis ge ǂoa ge wekheb !nâ ǂhanusi ǂanǂans, !Hūb a ǂhabase nî ūhâhe ǁGamǁaredi hîa ǂGaekhâisa a xawe noxopa dītoahe tsî !khō!gâsa tama xoaǁguib, Namibiab !Hao!nāsi ǁNaetin tsî ǂNuwiǁkhāsiba ra ǁgauǂui Dīǀgaub (2025-2030) kōse nî sîsenxab ǂnamipe. Nē haos tawa ge ǂgaeǀhao hâ in ge !kharaga ǂhanub mâisan, United Nations Educational, Scientific and Cultural Organisations (Unesco) di ǂnûǁkhaeba-aon, !hao!nāsi ǁnaetin !khōdana-aon tsî ǂnuwiǁkhāsib !âb di ǁanin tsîna. !Nakaǂnôa Direkteri, !Hū!nāsi ǀUmis tsî !Hao!nāsi ǁNaetin Proxramgu dib, Boyson Ngondob ge ­î bons !nâ gere ǁkhaeǁnâhe gowaǀîs !nâ ge mî, nē ǂhanusi ǂanǂans ǁîs a dana !harosa ra ǂnû­khaebasa, !hūb di ǂnuwiǁkhāba ǀgaiǀgais ǀkha. ǁÎb gere mîs ge, nē ǂgaekhâisa xoaǁguib nî ǂhâbasa daoǁgaub ase īsa, hâ a !kharaga xoaǁguigu tsî dīǀgauga !amǁare, ǂnuwiǁkhāsib !âb !nâ ra tsoatsoa khoena ǂkhâ!nâsa mā tsî hâ a ǁuiba nē ǂharugub !aroma khoraǂuisa.

Ngondob gere ǁgui!ās !oagu di ge ǁgamǁarede nî ǁawo­ǁawo, sîsenǀgaub hoa !âǀhuru-aon ǂâiǀgauga nî !gôa!gâsa, !khōǂgā hâse ǀkhō-aon, ǁnae-aon, ǀnōǁnâde ra dī khoen, !hao!nāsi ǁnaetigu sîsenaon, ǂnûiǂgādi tsî ǀhûhâsigu tsîn hoana. Ngondob ge UNESCO Namibias mâisab, Patrick Sami tsî nau hâ khoen hîa !â-e nē ǀasa sîsenǀgauba ǂgaekhâis ǀkha ge huina, koasa ge mā.

Unescos di !Hū!nāsi Proxrammi Mâisas, !Hao!nāsi ǁNaetin dis, Helvi Inotila Moshells ge ge mî, ǁnāti i !amǂgās hîa !Hao!nāsi ǁNaetin 2030 dina ǁgauǂuis dis ai hâs ra Namibiab ǁguiǂgāsens, ôa!nâde xu hâ !nurigu ai !gao!gaosa xoaǁguiga dīs disa ǁgausa. Nēs ǁkhāti ra ǁgaus ge, !hao!nāsi ǁnaetin ǂnamipe hâ xoaǁguigu a ǀnōhe ǁkhā tsî NDP6 !naka hâ !hū!nāsi omkhâisens !aroma a aimâisa xūn ǀkha ra !gû­ǁaresa.

Moshells ge ministerisa gangansa ge mā, ǁîs di ǂgaeǂguis ǀgaub tsî ǂan!gâs hîas ǂnuwiǁkhāsib aimâ-aon, ôa!nâde ra dī khoen, xoaǁguiga ra ǂgaekhâi khoen tsî ǁhao-aon hîa nē ­gam­aredi !nâ harase nî !ân tsîna. ǁGamǁaredi ge !hūb a ǂhabase nî ai!gû-ūhe, !â-aona ǁnā !ēsa nî māse ǁîn di ǂâiǀgau tsîn nē sîsenǀgauba nî dīǂuise.