“E tjezera okuhungira meraka ramama, Otjiherero, posi ya otja tji matu tjiwa atuhe, hi nomuano warwe pendje nokuhungira ku na eṋe meraka rautwa. Mena romakuruhungi omaihamise, ovirwaro vyavyo ngamba mbi navyo- omapandjarero weraka randje na wina okuhina okuyenena okuritwapo muro otja tje tjezera.”

Oomuihamwatima noruhoze romutanda Venaaṋi Kanḓorozu, wa Lephalale mOrukondwa rwa Limpopo mOsouth Afrika. “Otjingi tjeṋu otja tji mamu tjiwa, owami ondekurona yaimba mba huka ominyo mundino ndiri Onamimbia okutuurungira mOtjauana ave taurire kOsouth Afrika.” Ra Venaaṋi irimwe romaraka womitanda pOmbongarero yOvaherero nOvambanderu ndjari pohambo yondekurona ya Hangara Eharui meṋe ya Karukuvisa morukondwa rwa Ghanzi mOtjauana omayuva tji ya ri 7-9 komueze mbwi. Ovaherero kuza mOtjauana otjini, Onamibia, Osouth Afrika na kwarwe mouparanga wouye okuyaruka mozondambo zovaṱi novakuru vawo nu mu nao wina omakuruhungi wotutjindo nohuurire yawo. Kutja auhe ma yenene okuserekarera ondjendo yato otja tje izuvire nu harukuru otutjindo ihi atuhe tu tuwe movipwikiro na momatjangwa. 

Posi ya pokati kotuveze nu tjimanga Venaaṋi ma pambarere kutja omapandjarero wombazu neraka oveni mu mu naye novakwao momahi wozonganda ndji va tjinda, kai sere okuyandjerwa kaparukaze ngandu otjisuta pu maatji kamunikira eyuva rimwe. 

Mu nao otjeri ohepero ngunda okuuta Venaaṋi ku ma tja okurisuta oveni. Ma tja ngunda ape hi nokuyenena okurundurura orukapitaveze, poo okutjita kutja imbi mbya tjitirwe oruveze ndo mbyeeku tjita kutja ozondekurona ze kare mozongaro mu zeri nai, pe na imbi mbi momasa nomasorero wazo okuṱiza Ouherero nOumbanderu wazo. 

“Katu nokuhepa ovandu okuza pendje okututjitira nao. Katu nokuhepa Ovandoitji okututjitira nao. Katu nokuhepa ovaharupu okutjita nao. Me kambura kutja katu nokuhepa ozohoromende zetu okutjita nao wina,” Venaaṋi wa twa ombaze pehi. 

Pu me riyarikaṋene, mena romitanda nozondekurona zamuhuka, kovanene na avehe nai mbe nouṋingandu wondjiviro yombazu neraka otjovaṱize novatjere, okuṱiza ovyawo nozongama nokuvikapitasa kotutanga tworuyaveze.