Taimi Haihambo

Omauliko opaipindi oo haa ufanwa 065 Kiddies Festival nokwa nuninwa ounona neudo okwa teelelika a ka kale ko petameko laDesemba.

OKiddies Festival omauliko opaipindi ounona opo va dule okumona omhito yokulihafifa, vo va dane navakwao. Omauliko aa kae na naana kutya ounona okuxulila peedula ngapi, shaashi naava va koya peedula 10 navo otava dulu okukufa ombinga. 

Omuunganeki nomukwatelikomesho womauliko aa Martha Niilonga okwa ti neudo ova hala okweeta po omalunduluko ape, okuyelekanifa naashi va li va ninga odula ya dja ko. “Neudo otwa hala okufya oshisho kutya ounona aveshe ova nyamako komalihafifo aa. Eshi ohatu ke shi ninga momukalo ou kutya ounona ava ve li moshipangelo itava dulu okufika ko ovo hatu ka tameka navo, hatu ke va talela po koshipangelo, fyee hatu va twaalele oushikepengeyo opo navo va ude ohole nouwa woKiddies Festival,” ta ti.

Okwa twikila kutya natango ova hala  okuweda po omalihafifo ahapu, okuyelekanifa nomauliko opaipindi odula ya dja ko.

“Ohatu ka yandja omhito kovanageshefa vomangeshefelo opedu va tameke okuninga omaindilo outala opo va dule okulandifa. Neudo natango otwa lundulula onhele apa hatu ka ninga omauliko aa mOngwediva,” ta ti.

Ounona otava ka futa N$10 omanga ovadali tava ka futa N$20.

Omauliko opaipindi aa okwa teelelika a ka kale ko momafiku 6 – 7 a Desemba.

-taimihaihambo2000@gmail.com