Oritjatatu, tji ya ri o-10 ku Ndesemba (Tjitarazu), Operesindenda Nangolo Mbumba,, wa twirisire Ombuikiro yOmazemburukiro Wekuruhungi ra Hosea Kuṱako nOmbindi yonganda yOtjimungunda.

MOtoasisa tjOmutumba mOmongua wina ndji ri onganda yOtjimungunda yokuruwo kwesembi. Tji ya ri o-10 ku Tjitarazu ena makuruhungi mongondjero ya Namibia yongutukiro. Mo 1959 ondjembo otji ya umba mu mwa ṱa ovandu o-12 novengi ave sewa ozondjahe. Mozondjahe mu mwari Niclaas Uve Siririka na Methusal Muserandu Maṱunḓu, aveyevari mba muna ovito vyozohanga nu mbi mape ya kombunda kutja ozohanga inḓa onḓee kuvezepa. 

Ngunda eyuva ndi mOnamibia ari nomakuruhungi waro yapeke, kari pewa onḓengu ndje ripwire. Tjinga tjinene ari tjiukwa nokuzemburukwa kotjiveta Otjeyuva Rouye Rwomausemba Womundu, otja tji ra raisiwa i yOmihoko Omikutasane. Nandarire  kovakwatera va Namibia oveni ritjiukwa pekepeke. Kutja Orovita Vyomawe, vya Katemune, Ondjembo ya Snymana poo yo 1959 ngandu wina otjEyuva rOvakazendu. Pu mape hee kokutja kari ya hara onḓengu ndje ripwire notjihako tjimwe tji tje ripwire. Omundu poo otjimbumba a no kambumba akehe  otja tji keritjiwa otja konḓero no tja kombango no ru tjato ruako kuko okeni. 

Orini okuza kororowa aari sembamisiwa nokuzemburukwa i yOswanu ya Namibia. Tjinga monyengo yozombura nḓo ovandu okupanḓa okutjindisirwa kOkatutura okuza kOruvanda, ndino ndi ngeri omaturiro inga Ohoclandparka mOtjomuise, ovanane vayo avari komurungu. 

Ovakazendu wina va kara norupa romasa monyengo na momapanḓero wo 1959, kutja ndino ndi Oswapo ya Namibia i ririrese Eyuva rOvakazendu.  Otja komakuruhungi ovakazendu vOvaherero va ri ava zuvasana nokutanda kutja mave kara nomaraisiro wonyengo ovazoozu okutjindisirwa kOkatutura. Posi ya ovakwao vOvaṱakume ave katanauka nave kevevaza metuwo romerinaneno rongomainde ndaari tjiukwa otja ra Bowkera. Ovimbumba vivari mbi mokunanasana ape kara onyungunyungu nambano ndjari kokutja indi etuwo ndi arihe omu mu ha sere okuhitwa i yovazoozu. 

Nganda onyungunyungu ndji ovimbumba aviyevari mbi avi tanaurire moporise ndjari kokutja ayo mai vi yapura. Oporisse opu ya umbira. Monyungunyungu tjingeyo etemba rimwe roporise opu ra nyosirwa, i Kakurukaze Mungunda, otja tjikuza minda tjiva. Ngunda otja komuyaruke Kavitjimo Katuuo, eye ngwari mbo omuini, aari ye nomaze nga karanda koya Ngunovandu McLeod.