!GOMENǁGAMS – Tarekhoedi hîa hoa disihakaǀa ǀkharigu Namibiab diga xu a ūsadi ge ǁnāti ī !ēsa nî hō, !nonaǁî !nāsa nî !khoe proxrammi, Akademib tarare Aitsama ǂharugu-aodi diba xu. Nē proxrammi ge ǂoa ge wekheb di Denstaxs ai !Gomenǁgams !nâ United States (US) !hūǂnûǁkhaeba-aob, Randy Berryb xa ǂhanusise ge ǂanǂanheb ge marisise United States !Hūǂnûǁkhaebas xa mā!gâhe tsî marisihuiba !khō!oas ǂNûiǂgās hîa Aitsama ǂharugubatsoatsoas Omkhâis (AED) dis xa ge sîsenxa kaihe. AWEs ge hoa !hūbaisi programmi hîa US di Departements xa !khōdanahe hâsa tsîs ge tarekhoede ǁaupexa 50 !hūgu !nâ aitsama ǂharugubasens ǂnamipe ra ǀgaiǀgai!nâ. 120 tarekhoedi ge nē proxrammi !nâ-ū koro ǁkhâgu ǁaeba nî !khōǂgā ǁkhāǁkhākhâide nî !khō!oa. Nēb ge ǁkhā proxrammi hîa ge 2020ǁî kurib ǀHōǂgaeb !nâ tarekhoede ǂharuguba tsoatsoas !aroma di ǂhâba hâ huisenxūn ǀkha a mâxōǀkhāba. Berryb ge ǁnāpa ge ǀhao hâ i khoena gere ǁgui!āba !khais ge, ǁîn di ǁgūbas ǀgapi !gôab sîsenosib hîa ǂkhamkhoen ǁaegu hâb tsî marihōǂgādi !nâ hâ ǀguitikō-o!nâsib tsîna ra gowaǀî ǂgao !khaisa. Nēs hâ, xaweb ge !hūǂnûkhaeba-aoba gere mîs ge, US ǂhanub hoaǁae ra ôa-amsa mâti tsî mâ ǀgaub !nâb ga Namibiab tarade a huisa, îdi nē ǁkhāǁkhākhâis !nâ-ū ǂans tsî ǁkhāsiga hōbasen tsî ǁnās !nâ-ū a ǁāǁāhesa, hâga !ēde sîsenū tsî di ǀomkhâisa nî sī!nâsa. “Tare ǂharugutsoatsoa-aodi !nâ ǁguiris ge ǀgui ǀgaub sida Namibiab ǀkha ra sîsenǀhaobasa, î da mâ!kharu ǁkhā a sâuǁkhāsiba Namibiab !aroma ǂnuwi. ǀHaoǀhaosa ǂans ge ra ǁgau, tare ǂharugu-aodi nî !gâi!gâxas kara, ob hoa ǀhûhâsiba !gâi!gâba ra ǀama !khaisa, “ tib ge Berryba gere ǁgui!ā. ǁKhā ǁaxasib tawab gere !hoa soab aib ge Erongo ǀkharisi mûǂamaob, Neville Andreba ge mî, tarekhoede ǁkhāǁkhākhâis kaise a ǂhâǂhâsa !âsa, nēs ǀhûhâsiba hoa!nâ-aixase ra !gâidī xui-ao. “Sada ge ra mû, tarekhoedi mâtikōse !garise ra sîsen xawe ǀorose ra !khō!oasa. !Nāsase ra ǁkhāǁkhāsen, xawe ǀorose marisâuǂgaedi marisihuib tsî sâuǁkhāsib ǀomkhâidi !ēde ra sī!nâ. Kaise di ge ǁkhāti ǀoro !gôab !nâ ǀgui tarekhoede ǂgaeǂguis !harodi !nâ hâ,” tib ge Andreba ge mî. ǀKharisi mûǂamaob ge US ǂhanuba koasa ge mā ǁîn di ǁgūtsâdi tarekhoede Namibiab !nâ ǁkhāǁkhākhâis !nâ-ū ǁāǁās didi !aroma.