OKONGO – Oopelesenta 80 dhaakalimo kOkongo ohadhi longitha omeya ga yela okuza koopomba. 

Ndhoka odha kolekwa ku kansela gwoshikandjohogololo shOkongo Efraim Shipindo, ngoka ta ti ehumokomeho momundhingoloko gwawo otali endelele nolyu uka komeho. 

Oshikandjohogololo shOkongo shoka sha gama koongamba dhaAngola, oshimwe oshinene moshitopolwa shaHangwena. 

Okongo oya kala ya taalela uupyakadhi wehumokomeho, ngaashi oondjila, ondjala osho wo omayakulo ge li kokule, sho osho shoka ngashiingeyi ya tala ko oshikandjohogololo shawo sha huma sho omayakulo ogendji ga thiki popepi. 

“Ehumokomeho moshikandjohogololo shetu otali ende lyu uka komeho, aakalimo yetu ngaashingeyi oya etelwa omayakulo agehe popepi nayo, noyendji oya nyanyukwa,” kansela ta ti ngaaka. 

Ta kumagidha kutya omeya ngoka ga etwa popepi inaga kala ashike gokunwa nenge okuteleka ihe naga longithwe okunduluka iikulya osho wo okuya po niikunino. 

Shipindo okwa fatulula kutya elalakano lyawo, egumbo kehe lyi kale lyi na oshikunino momakoye gawo, okuya po niikulya yo ya shonopaleke wo elongitho lyoshimaliwa okulanda iikulya oshowo okulya iikulya tayi gandja uundjolowele. 

“Elalakano lyimwe ishewe okuthiki tha ehumokomeho mOkongo ayihe mwa kwatelwa oopelesenda dhoka, ndhoka dhaakalimo yaa na natango omeya ga yela,” ta popi ngaaka. 

Shipindo okwa ti, ina hala nando omukalimo gumwe a thigwe konima, ihe naya tyapule uuwanawa woshilongo shika ayehe. 

Ta ti omeya omwenyo, onkene kehe omukalimo okwa pumbwa okukala ta longitha omeya. 

“Shoka twa longo, okuya po nooproyeka dha yooloka, omayakulo agehe, Okongo oya huma lela komeho yo kayi li we ponkatu mpoka ya kala yi li nale,’’ ta ti ngaaka. 

Aakalimo oyendji oya koleke wo kutya oya nyanyukilwa ehumokomeho sho lye ya thiki. 

Matilde Shikongo, yina yaanona yane okwa ti omeya ga yela oga hwepopaleke onkalo ye ya kehe siku. 

“Okwa li handi ende oondjila oonde okukateka omeya ga yela, ihe nena opomba oya etwa popepi,” ta ti ngaaka. 

Omunafaalama Andreas Nanghama okwa ti omeya oge mu pe omukumo okuyapo nomadhiladhilo giikunino, opo a vule okumona wo oshimaliwa. 

“Onda hala okutameka oshikunino shandje osho wo okuninga epya landje lyiikwamboga, ondi wete kutya shika otashi kwathele ndje okumona oshimaliwa sha gwedhwa po,” ta ti ngaaka. 

Selma Nangolo naye okwa ti omeya ngoka ga etwa popepi negumbo lye oga ningi onkalo ye ohwepo oshoka ita ende we oondjila oonde. 

-vkaapanda@nepc.com.na