EHAFO-Vakurupe ava vavali kavatokwere kutengwidako yirwiso eyi vagwene uye wokndjero sirongo Namibia sikamanguruke. Yirwiso eyi kavatokwere kuyigava kwahamutjangantoni gombunga zaSWAPO . Yirwiso eyi kuna kara eyi vagwene siruwo sanare kovakwayita vaPLAN,vavapere asi vayihoreke nampili moomu kwakere asi siruwo sina kwakere siruwo sosidigu. Momapeu gana puko otate Jordan Inahonde Nelundu,kageve yirwiso eyi kwaNangolo Mbumba hamutjangantoni gombunga zaSWAPO, pomukunda ehafo, moUukwiyuushona momukundahorowero gwaOshana. Nguuru gomukunda Oshana Clemens Kashuupulwa,yige gumwe katumine mbundi ezi komberewa zaSWAPO asi valikwali ava kuna kara noyirwiso awo hena vana hara kuyigavako. Age katente asi nomvhura dakapita muswamane ogu kwawizire kwendi nokuyamutantera asi age kuna kara noyirwiso ana hara kugava nye ana divara Edina lyoge muntu navhura kuyipa. Ezuva limwe tatuligwana nokupurange nsene nadiva Kapitaholo,ame yipo namutanterere asi namudiva. Kutunda opo age kwahundilirenge asi nitantere Kapitaholo asi vahepa kulimona.
Eyi kwakwete siruwo dogoro muswamane ogu tayatokora nye atanterenge asi yinke ana harere kumona Kapitaholo. Makura tatanta asi Kapitaholo kwaperenge yirwiso narenare komeho sirongo sikamanguruke, asi nahepa kugapungura. Nguuru yige nye ana kugava esanseko eli, makura name yipo nakere nahana kudiva asi yinke nanirugana morwa sihorokwa sangesi kapisi sireru morwa kapi nadiva hena asi Kapitaholo yilye. Nguuru makura yipo gatanterere mukurona govaporosi momukunda Ndahangwapo Kashihakumwa, ogu gazire age gwane asi muswamane ogu yosili kuna kara noyirwiso. Nokutanta asi yirwiso eyi yahepa kutunda komuntu gakere asi mukondi morwa aga mauta gomanene ntudi gokuvhura kukara nago googu ana kara asi mukondi. Eyi kuna kumoneka asi Kapitaholo ntudi mukurona gakere yimo simpe ana kutanta Kashuupulwa. Age kuna kuyizuvha nawa-nawa asi morwa sinke tate ogu gapungwira yirwiso eyi dogoro ngesi. Mompo zoShiwambo kwakara asi nsene vana kupe suma wahepa kusigava kogu gasikupere kapi tovhuru kusipa nkenye gumwe. Kashuupulwa kahundilire vantu womomukunda gwendi asi nsene koveli vana kara noyirwiso yangesi vahepa kuyigava, komberewa zaSWAPO komukarelipo mbunga zaSWAPO momuknda Erastus Kapolo, yipo asi yirwiso yangesi yahepa kukasika oku yawapera. Mbunga zaSWAPO yipo nazo kazitokwere kugava yirwiso eyi yakere asi yaPLAN kepangero. Mbumba ogu kakere asi yige kakarerepo mbunga mpangeli mokutambura yirwiso eyi kapandwire tate Nelundu namukadedi eyi vakara asi kwakaro nevango vahoreka yirwiso eyi mokuyipungura nonyuku dononzi. Vamwe vetu mwakara nomukaro asi nayina ngesi nepu vakupa mbapira asi twara kwaPresidente Hifikepunye Pohamba, komeho oka sike nare onotantereko muntu asi yinke ono kara nayo. Ano ependa ngwendi Nelundu namukadendi awo kwakara nehoramo omu vatokora kuhoreka yirwiso eyi vahana kutanterako muntu nkenye. Yimo ana kuvapandura ngoso hamutjangantoni gombunga mpangeli zaSWAPO Nangolo Mbumba.