Abraham Mwanyekange 

Namibia Premier Football League (NPFL) otai fudike ongholo oshivike eshi. Okwa shaala ashike omadingonoko opavali, limwe omongula nalikwao omOshoondaxa. Eespana mbali otadi ka tala kutya ilipipo tai ka findana po olixa odula ei yo 2025/2026. 

Ospana yoAfrican Stars oyo i li komesho noitwa 54 konima yomaudano 28. Ou e li ta taataa muStars oChula Chula noitwa 53. Pokati kaChula Chula noStars ope na ashike oshitwa shimwe osho sha eta efiyafano lofindana po olixa la yeulukila espana edi dopavali, notashi ulike kutya oshiwana otashi ka mona ashike omufindani komaudano axuuninwa omongula nomOshoondaxa. 

Ospana yoAfrican Stars oya kala noku shi endifa nawa mefiyafano loneudo. 

Oyavena omaudano 15, tai lifiye ofika oikando omuwoi, oya kanifa ashike omaudano ane. Okuya kumwe oya tula mo ekoola 43 yo ta i tulwa omatanga 18, onghee oya ulika eenghono komesho oshoyo konima unene okulikelela opo iha i tulwe omatanga mahapu. 

Kakele mopaife oya ta alela eshongo lakula. Stars okwa pumbwa okulitulamo y e takelele okuninga epuko ngee okwa hala oku kala komesho nokufindanapo NPFL. 

Eeshoke Chula Chula nado oda kumwifa vahapu unene eshi dakala noku shi endifa nawa momaudano ado o-NPFL neudo. Nado oda findana omaudano 15 notadu ulike de litula mo no inadi hala okutula mo ongela yokonima. Oda ulika da tokola okulwa fiyo omefiku lahuuninwa neinekelo ngeno Stars a kanife oshitwa shimwe. 

Omaudano ahuuninwa o-NPFL otaa danwa mongula 18 oshoyo19 April 2026. African Stars ota taalelwapo koUNAM mOlomakaya omanga mOshoondaxa ota kundu FC Ongos, nokwa talika kutya espaana odo dopavali otadi dulu okutula oikulya yoStars omadu ngeenge itayi endelele. 

Eeshoke Chula Chula mokapale kOshakati I ndependence otadi talelwapo kOkahandja United oshoyo oBucks Buccaneers. 

Chula Chula noStars aveshe ove shi shi nawa kutya osha fimana okufindana po omaudano avo opavali. 

Espana ngaashi Tigers, Rundu Chiefs, noLife Fighters oda wamo nale molixa yopombada nom paife ode li palela nale ondjila yado okuya kolixa yotete moshilongo konima eshi odo damana dili pedu molixa yopombada. 

Ovaholi vomaudano vahapu otava ka kungulukila koupale moshilongo ashishe, unene tuu kOshakati oshoyo koWindhoek molwaashi keshe umwe okwa hala okutala ekopi eshi tali kayandjwa moshoondaxa. 

Omutoolinghundana womaudano Silas Timotheus woFooty Namibia okwa pula edakadaka apa tali ka nambela. “Mo 2013, oNamibia Premier League okwa li ya taalela oshikumungu sha faafana. 

Edakadaka okwa li la longekidwa opo li dule okutwala ekopi keshe kokapale oku kuna ospaana oyo taili findana po. Olixa odula oyo okwa li i li pokati koBlack Africa ya li kOtjiwarongo omanga oAfrican Stars oya li koWindhoek. 

Black Africa oyo kwa li yavenapo ekopi, nedakadaka okwa li latuka li twale ekopi kOtjiwarongo meendelelo,” ta ti. 

Okweenda okuya mo2026 omufindani natango ota kamonika mexulilo shivike eli pokati ka Chula Chula noStars. Timotheus okwa pula ngeenge nelomba okwe lilongekida ngaho okukatuka noneudo. 

Ovaholi vomaudano vahapu otava pula ta vatii, o African Stars ota i kakwatelapo ngaho oitwa yayo yoo imone efindano? Ile Eeshoke Chula Chula ota ka ninga oinyengandunge ye a vene po olixa yopombada oshikando shaye shotete? 

-amwanyekange@nepc.com.na