RUNDU – Hamutjanga gokukarereramo moMinisteli zonomukunda, epangero lyonodoropa, mambo nekuliko lyokonomukunda, Sirkka Ausiku, kaperepo asi age kapi nalihameseramo nampili nakauke komukaro ogu guna kara asi gopampo govaShambyu. Vamwe worudi rovaShambyu, vakara asi vezimo lyouhompa ngesi kuna karapo nomutangu pokatji kaHompa Angelika Matumbo Ribebe. Ava vana kara momukaro dona kumwe naHompa Ribebe, kuna kara worudi rwedi. Awo kuna kuyimona asi egano eli ana kara nalyo Hompa asi mugara gwaHompa gedina Gende vamupe posa zonene morwa asi mugara gwendi aw okapi vana kuyizuvhira mbili. “ Ame kanigwene mbapira vanatjanga vezimo lyouhompa, omu vana tjangamo erwaneso asi eyi ana kugazara Hompa yahaza moyirugana. Awo kavatulireko mbapira zina kutunda kwaHompa nye mbapira ozo hompa kapi anazisayina. Yimo ana kutanta Ausiku kosayitunga zaNew Era.
Nsene asi kwazitjanga nye mwene Hompa yinke kuna pilire esayino? Ame kapi tani mana siruwo sange kutara yinkinke eyi yina kara asi kapisi kuna tundu kwaHompa.” Ausiku simpe kayizeresere asi age kapi ana gwna mbapira zina kutunda kwahompa asi ngano mugara gwahompa vamuture mevango olyo, lyokukara asi mukurona gendesi pamberewa morudi rwaShambyu. Vezimo lyouhompa kavageve mbilive zawo zorunyegenyo kwaSirkka Ausiku momazuva 29 Siwogedi 2013, omu vana kugava runyegenyo rwawo asi Gende kapi ana wapere asi ngano akare mwankenye egendeso lyopampo, unene eyi yina wapere asi ngano kuyigendesa vene vezimo lyouhompa. Nokuturako nye mbapira ezi vana kugazara asi hompa gazitjanga momazuva 23 Siwogedi 2013,omu hompa ana kuhundira hamutjangagokukarereramo asi Gende vamupe mukuronagendesi gorudi unene yomomberewa. Mbapira ozo kuna kumoneka asi kavazitumine hena kwaNguuru gomukunda Kavango, Samuel Mbambo.
Gende kalimbwilire asi ame kapi nina hara evango nkenye,ame kunakulihameseramo morwa uvera wamukadange.” Ame kapi nina kulihameseramo mweyi yegendeso lyorudi. Gende simpe kagwedereko asi yininke kapi yina wapa nampili vene womukwarero gwange vaShambyu. “ Ame kapi nina hara kuuyunga momunene, morwa nahara kutwara vantu ava kavatjenge mbapira ezi kovahahende vange, ndi asi nayinye eyi kavatjenge kaniyigeve nare kovahahende vange.yimo ana kutanta Gende. Gumwe gwawo kavamupere atjange mbapira ozo kapisi hompa mwene tuna mudiva asi yilye mutjangi. Gende ntaantani tupu kadukire moDTA kumwe nokuza koAPP. Vezimo lyouhompa kuna kuyimona asi Gende ana kara nononkondo unene, ntani age kuna kuyimona asi nepu yiza moyirugana, mbunga zendi zaAPP, kuvhura nye vakayiruganese oyo momahoroworo ogo tuna yuka asi mbunga zendi kuna kurugana. Uvera waHompa Ribebe, nokukara asi nkenye apa age monomutji mwelike yipo nye ana hara asi mugara gwendi gahepa kukara moumpitisili paupolitika.
Womukwarero vakare asi vagara ndi vakadi awo kuna kumupulisira tupu Gende asi gomukwarero kwato yimwe yapeke. Kuna kumoneka asi vezimo lyouhompa kapi vana divako Yuma kweyi tuna kuuyunga. Kweyi varugana vekoro lyetu vatusiga makura nayina yikakare yaGende? Awo kavayinkondopekere asi vadiva asi gwawo Ribebe, kuvera ntani awo kapi vana kuyihafera omu ana kugendesa mukaro gweyi yompo. Mokukwama ngendeseso zovaKavango, unene vaShambyu, noveta vaturapo ava vatusiga kwatanta asi gokuyakwareramo kapi ana kara asi kuvhura nage agwane mauwa aga vana kugwana vene vezimo lyouhompa, age gokukwareramogahepa tupu kukara asi kwayakwareramo. Kapi tagwana nkenye evango megendeso lyorudi. Yimo vana kutanta.