I Deon Schlechter
OTJOMUISE- Nandarire kutja omaundjiro wova Namibia ovengi mouparanga wehi kutja makurongo ombura nawa momautiro wa Seninani, yari omungandjo, mapeya ehi omayuva womuna womundu arinjingena nu nandarire mu Rozondu nganduu mu Tengarindi mo 2014 arikara mokunyingena, otja Kombongarero yOrukondua rua Afrika Kehi kOmamuho yOmaukiro wOmbepo Meyuru, Southern Africa Regional Climate Outlook Forum, ousupi o SARCOF.
Ombura ongundi okuza kombura ndjazuko yatuna rukuru navi tjinene komahupo yovandu motukondua otuingi mouparanga wehi oto tjinene tututandera kovikunua viotutumbo novikunua nawina komario. O Namibia nai riri monguehe ondeu yourumbu oure wozombura o 30 mburihiyarora notjiveke tjitjazuko Otjirata tjOvikunua tjarakzire kutja mapekara omakunino wozomiriva nozoperesende o 50 kehi ombura indji mena rouhepe wombura nomena rehi ndihina omueme mbuapuirire omakunino tjinga ariri ekahe. Omaunguriro wovikunua mehi (ozomiriva ozombapa, omahangu, ovikokotua noviria) maviyenene okutunua tjinene iyongaro indji oruveze ouhepe womario wina mbuatanda ovinamuinjo nu noho ovikuria pozonganda amavirire ovihena motukondua atuhe ondjara muyahonapara.
Okumuna omeva wina mapeya arire ouzeu motukondua otuingi nomiria viozondama viayaruka kehi tjinene okusasaneka nombura ndjazuko.
O SARCOF yari ayauka kutja omahi wOmboronganeno yOmahi wa Afrika Kehi Komamuho, o Southern African Development Community, ousupi o SADC, mayemunu ombura ombua otja tjiiroka poo kombanda ya nao okuza mu Seninani nganduu mu Tjikukutu, nu nandarire nganduu okutika ombura ombe. Ngunda o Namibia araharere ape okuhina okurora ombura mu Seninani na Tjikukutu, mapemunika ayo ehi tjingetjo arimunu ombura otja tjiyaukua ndjimairoko otja tjiiroka ohapo nganduu mapeya kombanda ya nao omieze mbimaviya nganduu komayandero wa Tengarindi ombura ndjimaiyende.
Omaukiro womarokero wombura momahi worupa ruo SADC koutjiro wokutja mairoko kombanda yohapo, yaririre owatjiri indi koutokero wa Kapa otjikamba tjitja wirire pehi novandu omayovi avesewa nokuhina omitutu okuwama mo.