I Kae Matundu-Tjiparuro
OTJOMUISE– Omayuva womasuviro ngazuko ongongo kayari mokuvare nunguari yari porutjandja romitanda romanyando mOkatutura Ovambanderu puvari nomukandi wombazu.
Ovitjitua imbi viautire Oritjatano ngurova nomuhiva mbuari nombunde oruveze indui omundu ndumoyenene kutja iimue yozombunde zomuhiva ndjakarereko motjiwana tjOvambanderu nOvaherero, kutja omuno mo Namibia poo oko Tjauana. Ombunde indji ondjiri Mbeka ua Hianangombe omukuenambura nai ngurarera kOtjauana tjovikori. Oritjatano otjiuana tjaworonganene nawa nu aha tjiworongana omungandjo tjinga atja tokererue amatjinu oruazo rombazu yomuhiva wa Hianangombe notjimbumba tje mumuari ozoserekaze ndaa ze kamburire nokuhina okukeyakeya. Hianangombe ondone ndjatuwa pehi tjinga auhe nguari imbo navanga kutja matonenue ozongombe zoyao, eye aari aehari marongere tjapewa kutja ozo zeyanuawi noozene zene tjandje wawire mombundiro.
Oritjatano omundu moyenene kutja outuku watjirirue meke tjinga tjiva tjivazapere tjandje oine yotjituku huka yatono indi Oroviungura nu tjandje ngunda ovandu tjiva vasewambo tjandje ngunda kaveyarora nandarire okuuna. Otjotjiri Hianangombe notjimbumba tje omundu konoororo okuuna kaparukaze. Eye nguri omundu omutanda motjiwondo, noumutanda wopokati omundu ngumuyenene okutja omutanda nguakaha, eye waraisire kutja nanguari ombazu poo imbo muhiva poo outjina katjina tjouti wambeto uriri otjovengi tjivemuna nongunangarasi, nunguari ozombokiza kouti wambeto nawina omitanda viokematambo zazo wina maviyenene okuiikongorera. Nu kakuii kongorera porue uriri nunguari wina okuiitjatisa.
Otjitjate notjinyanukise potjitjitua tjombazu ihi yari kutja kapari otjina tjarue tjitjerirungire mutjo tjinga omayuva womasuviro inga ayari ombazu porue uriri nokuhina orunakui poo omerirungiro wotjitjitua tjarue tjimuna omaimburiro ngasuvera okurirunga mombazu. Oritjatano yari imbo omuhiva uriri. Noroviungura pakarere omahongero wombazu movinenge peke peke tjimuna kutja orukupo mombazu ruhungirua vi; outumbapare kutja utjivisiwa vi pokati komatundu ayeevari waingui nguateyewa etumbo naingo nguemuteya. Wina pakarere omahongero wozondjupa peke peke monganda nokutja zeheya tjike nuzezera vi nokuzera otjikuaye. Pokati komahongero inga tjandje Hianangombe notjimbumba tje opuveri okusopora omahongero inga. Nungurova otjaritjatano atjiyarukapo rukuao nu Hianangombe averara noutuku rukuao ovo puveriraisire otjozombunde ndehararako nu wina ndehaurua ko kutja embo rorukarorua kutja riurisiwe kutja omutjevere wa Israela karara ko nu kauruako, Hianangombe notjimbumba tje owo wina otjovatjevere vombazu kavaurirue ko nu kavararereko. Oroviungura pomapatururiro womukandi imbui kotjiveta pari orata nomutize wOtjihuro tja Tjomuise, Muesee Kazapua nOrata yOkarukondua kOmatoorore kOmondivitivi ya Katutura, Ambrossius Kandjii, owo mbaraisire ohepero yombazu. Kazapua waraisire kutja ngunda apehiayakara poo apeheyeya oporotika, poo ongamburiro patenga ombazu. Posio ndinondi ongamburiro yarira oseinina povina imbi. Ondjo indji Kazapua weiyandjere kovanane vombazu ovo mbehararakanene po ombazu yawo otjotjiugnura tjavo otjovanane vombazu.