Sîsenao-i xa xoahe hâ
Tsoaxaubams – ∥Aupexa !gôa!gôahe rasa !oan ge 44 persentgu di ∥amaxū-aon hîa ge ôa!nâde a dī-aihena ra mî, haka∥î!âb ╪oago kurib 2012 dib ge ╪harugub !harib ai kaise !gâi isa, !kharu ge kurigu |kha i kara |gowe|nōhe o, !gōsase hoa!nâ-aixa ╪harugub ∥gats nî !khūb!naes ∥aeb !nâ kōs karao.
Nē ╪ans ge ∥nāti ī !nurib hîa ge ╪oago kurib di Hôasoreb !nâ Institute for Public Policy Researchs (IPPR) xa dīhe hâ i ôa!nâdi khao!gâ a mā╪uiheba xu ra ╪oaxa.
Nē ôa!nâdi !nurib hîa IJG Retail Business Survey ti |gui a ╪ansab ge mâ !nona ∥khâgu hoagu !nâ ra dīhe ∥amaxū-aon di !âubasendi matikōse a dī|oa|oasa !khaisa !âis !aroma.
IPPRs ge 20 kai ╪harudi hîa |gaisase mâ╪oa hâdi |kha dî!nâ∥gam∥arede ra ūhâ, ∥îna xus nî ╪anse ∥în di ∥khoregu di !âubasendi mâs kōse ra sī!nâhesa, ai∥gause: ╪harugu!nân ra mâsib, ∥amaxūs tsî ∥ama-aona ╪khî╪khîs, matikō |nōb xūnan ūhâs tsî harase ╪âibasen tsî !kharaga!nâgu xūna ╪gâxa-ūs tsî mari∥hōgu ân tsîn ╪namipe.
!Nurib !nâ i ra mîhesa !oan ge ╪gui ╪harugu-aona ∥în sîsenaona |oro|oro tamas ka io !gôaba |gapi|gapi ∥khā tide nē ׀uniga !âb 2013 dib !nâ.
Nē gere dî!nâhena xun ge hûdisi∥khaisa|a persentgu ∥amaxū-aona !gaesen tsî ra mî, ∥în !narib xa ra !aromahese ╪oa!nâde ūhâsa. Ai!â ge hâ i !nurib !nâs ∥khās khamidi ge ╪gui ╪haru!khaide kai ∥guirin |kha nē ╪guro !âb kurib dib !nâ a ∥axa. ∥Nā !kharagagu ╪harugu-aona xu gere dî!nâhen ge !gōsase, sara∥amaxū-aon, elektrixūna ra ∥amaxūn, ╪ûn tsî axūn ╪harugun, om!nāxū ∥amaxū-aon, kuru-ūxūn !khaigu, so|ôa∥gâudi, ╪gaeran tsî karan!khain, ╪khanin tsî xoa!nâ-tsî-xoa-ūxūn !khaigu tsîna.
∥Amaxū-aon ge ra mî, ╪oago kurib di |uniga ∥khâgu Tara∥khumu∥khâba xu Hôasoreb kōse hâgu !nâs ge hō╪gāsa kaise !gâi isa, 44 persentgu di ∥amaxū-aon dî!nâhe geren !oa ai!âkam kurigu |khats kara gowe|nō o, tsî nēs ge !gōsase saran, ╪ûn tsî āxūna xusa. Xawen ge 17 persentgu din hîa ╪khanin tsî xoa!nâ-tsî-xoa-ūxūn, so|ôa∥gâudi tsîna ∥gaise ge dī ∥aegub ∥khâgu ╪oago kurib digu |kha i ga |gowe∥nōhe o. ╪Ûna ra ∥amaxū!khaigu ge !gâib |guiba nē |asa kurib !nâs tsîna ra mû╪uibasen.
∥Goa╪uidi hîan ūhâdi xab ge !nariba danasa ra |hō╪ui !nāsa ╪harugudi ge !nurisa !oa. Sao ran ge noxopa |nî ∥goa╪uin nē ╪harugu-aon ra hō!âna; ∥khāsigu !nubusib, ╪gan|gaugu ╪haros, xūna ∥ama╪gās !aroma marina hōbasens, sâu∥khāsib ╪namipe îgan|geb !nâ ûis, sîsenmâsigu ╪hanugu, !gae∥are ╪harugub, teks-e !khōdanas, !nan|gaib, xūna !hūba xu ╪oa-ū tsî ╪gâxa-ūs ∥garagu tsî |hôakao!narib hâna.
╪Khawadīb ge ∥aupexa N$5.1 miljuns ╪oa!nâsa ge !aroma ∥nā gere dî!nâhe ∥amaxū!khaigu !nâ ╪oago kurib di |uniga !nona ∥khâgu |guigu !nâ. !Narib ge ∥nātikōse ge |gaisa i tsîn ge ╪gui |honkhoena a mî ∥oa ∥în di sîsenaon tsîn aitsama nē !narib !nâ ge !â i !khaisa. |Guis khami ī ╪harugu!khai-i nē gere dî!nâhen di-i tsîn ge sîsenaona nî sîsen|û kaise īs di |awe∥gui-e ūhâ tama hâ nē ∥aeb !aromasa.