OTJOMUISE- Oroviungura ozombongo peke peke novahenendu peke peke motjiwana, mumuaru omuhaamise wovihaverro vio Rutu rOvamvaherero nOvambanderu rOtjitiro Otjindjandja, Utjiua Muinjangue, vaworonganene metuwo rombongo indji o St Stephanus-St Phillip mOkatutura okuhatoi omahikikiro wOmuhonge Omunene wayo, Ewald Kakero Mbaeva.
Komurungu wotjitjitua ihi otjimbumba tjozohiva tjo St John Apostolic Faith Mission tjahongorerepo ovimbumba viozombongo zotukuise momivanda via Katutura okuyenda kombongo indji o St Stephanus-St Phillip. “Ombanda indjo nguri yendjitiza nokundjitjevera nganduu kundinondi. Kutja indombe indji maindjitjevere tjimuna indjonguru hinakutjiwa.”
Inga yari omambo wOmuhonge Omunene wo St Stephanus-St Pillip Healing Mission Church, Ewald Kakero Mbaeva. Pe feste rombongo omayuva womasuviro ngaziko, Omuhonge Omunene wo St John Apostolic Mission Church, Petrus Tjijombo, otja hukikire omuhonge Kakero ombanda ombe tjitjari otjiraisiro tjokutja nambano ouyenda we movitjitua via Ndjambi viarondo ondondo yarue. Omuhonge Tjijombo wakuamberereko omuhonge Mbaeva kutja oviungura mbiri komurungu kavipupu. Oserekaze ya Kakero Mbaeva, Omuhonge Mama Celie Kakero, tjigetjo wahukikirue ombanda yarue. “Ami mbamunu ozongumbiro ndinondi. Mezeri kutja ozongumbiro inda mazendjitiza okuriama komurungu notjiungura ihi,” Mbaeva watja. Eye eyuva tjingero nguatjitire ozombura 86, wakara motjiungura tja Ndjambi okuza ko 1968 tjatuirisiwa otjomuhonge wo St Phillip mOtjauana. Tjapurua kutja ouyenda we otjomuhonge ngaa kundinondi, eye watja nai: “Omundu tjimokawondja tjiumuna otjehi tjitjiri momurungu woye uriri katjoho tjitjiri kongotue yoye. Ozondjira zandje azehe, ozombua nozombi matjiukua iimba mberi kongotue yandje. Oviungura viandje viongamburiro viawondjo nawa mena rokutja otjina tjokuyakurua itjiva nokunjengua ivarue.”
Nandarire kutja ondjira motjiungira tje ihi mapeya ondeu eye mazeri kutja ozongumbiro ndaperue Oroviungura mazemutjindi. Mbaeva warira omuhonge omunene wo St Stephanus mo 1979 tjiza nokuhanika kuna o St Phillip mo 1974. “Ombongo yahanika mena rokuhina romazuvira woposio,” watja amateza ousupi ovitjitua mbiatuara kombongo ndjiripo nai. Mo 2000 the ozombonge azeembari inda otjizawana. Mbaeva onguri omunane wayo oyo ndjina ovakongorere mOpuwo na Sesfontein na kuarue.
Kombunda yomahukikiro womuhonge wayo ngurova ombongo otjiyakayendere komurungu nefeste nganduu ko Sondaha.