WINDHOEK – Aakalimo yomoshitopolwa shosiingela (single quarters area) molukanda lwaKatutura otaya ti kutya oya geela yamwe yomooyene yoondingosho moshitopolwa nenge olukanda nduka mboka taya ti aniwa ohaya egulula oondingosho dhawo sigo oowili dhokoongulasha, onkalo ndjoka hayi etitha omayogelelo – omakudhilo oshowo uukalinawa wa nika oshiponga koshigwana nenge aakalimo yomolukanda nduka. Momukanda gwenyenyeto ngoka gomasiku 30 Septemba, gwa shangelwa Muni gwaVenduka, Opolisi yaNamibia, Opolisi yOshilandopangelo oshowo ookopi dha tuminwa Kansela gwaMuni, Benestus Kandundu, aakwashigwana otaya nyenyeta kutya ihaya kotha we uusiku omolwonkalo yomayogelelo nomakudhilo sigo okomitakushi, noshikwawo omaluvalo gawo nenge aanona yawo ihaya vulu we nokuli okwiilonga, nonando moshitopolwa nenge molukanda nduka omu na aakokele/aakulupe wo oyendji, ooyene yoondingosho kaye na ko nasha. Gumwe gomaanyenyeti, ngoka ina hala edhina lye li tumbulwe ota ti kutya aakwashigwana/aakalimo mboka ye na omalukalwa nomagumbo gawo ge li momudhingoloko goondingosho – oondunda dhika dhiikolitha ohaya lyata wo oonyata oshowo omasita oshoka ookasitoma dhoondingosho dhika ohadhi ikwathela awike kehe mpoka momapandaanda nenge nokuli momalugumbo gaakwashigwana yopomidhingoloko mpoka.
Pauyelele womukanda gwenyenyeto, ookasitoma dhoondingosho ohadhi thikameke iihauto yadho pehala kehe nokwiidhenga momalugumbo gaakwashigwana, oshoka inapu ningwa omalongekidho ge nasha nomathikameno giihauto kooyene yoondingosho. Omukalimo omukwawo ngoka wo naye ina hala edhina lye li tumbulwe, ota ti ekende lyondunda ye yokulala okwa li ya dhengwa mo nemanya kaantu mboka kwa li taya lu uusiku, kakele ina vula okuninga po sha oshoka okwa li a tila okuya pondje – e ke ya pule. “Konima yotundi ontiheyali yokomatango (19H00), aakwashigwana/aakalimo ohaya tila okuya pondje,” osho ta nyenyeta, nokugwedha po ta ti kutya uupyakadhi woludhi nduka owa kala ngeyi konyala omimvo ndatu ngashingeyi. Omukanda gwenyenyeto natango otagu ulike kutya molukanda nduka ohamu kundanekwa nokulopotwa iiningwanima yi nasha nomateyo gomagumbo, omayekulo/omayugo goongodhi dhopeke nuundjato. “Tse ohatu kala tu uvite kaa tu na we egameno lela noonkondo adhihe. Oto uvu ashike omakende taga tatulwa, omitopelo dhoondjembo nomamanya taga umbwa omausiku,” osho omukalimo omukwawo ta popi. Ota ti kutya oku na etegameno kutya ngele omukanda nguka gwenyenyeto ogwa thiki momakutsi gOmunambelewa Omukuluntu gwaMuni, Niilo Taapopi, ooyene yoondingosho otaya ka thiminikwa opo ya pate oondunda dhawo dhiikolitha pethimbo ndyoka lyu uthwa – ano potundi ontimulongo yuusiku (22h00) mokati koshiwike oshowo potundi omulongo nambali guusiku (24h00) momasiku gomahuliloshiwike.
“Otwa hala elongelokumwe. Tse inatu hala andola ya pate thilu thilu – oondingosho dhi patelele, molwaashoka otu uvite kutya otashi vulika ooyene yoondingosho haya mono ashike uuhupilo wawo moka,” osho omukalimo nguka ta ti kutya inaya hala ashike ooyene yoondingosho ya longithe nayi omaukwatya gawo – oonkondo dhawo. Omukalimo ngoka e li wo a geya, ota pandula Kandundu, ta ti kutya okuza nkene kwa li ya ungaunga nomakemo gawo, okwa kala lela noku ya kwatha nokuyelithila aakalimo shoka ya tegelelwa ya ninge. Kombinga ye, Kandundu ota ti kutya okwa yakula omukanda gomanyenyeto note ke gu tuma kuNiilo oshowo elelo alihe opo ya tale shoka shi na okuningwa po.