KAPARARA-Sure zaKaparara,zakara kutunda pontambondunge zokuhova dogoro zauntambali ngesi kuna kuza zikahageke morwa kwato mema aga navaruganesa vanasure ntani varongwa. Epiro mema kuna twaredere kuronga nokulironga kukara noudigu kutunda tupu ketameko lyomvhura eyi. Sure ezi kwaziturapo kutunda momvhura 1970,ntani azo kwakara nokilo 110 kuza koutokero wodoropa zaRundu. Kutunda tupu apa zazonauka Pombo zonkarapamwe,vamitili novarongwa wokusika ko 200, posure ozo, awo kugwana nye mema aga ava kaveta monondoroma dokusika ko 200l kutunda komukunda peke, muna kwatere nokilo murongo okasike kevengo olyo.
Epiro mema simpe kuna gumu momudona yimuna, omu nayo yina kulipakerera momukunda mokupapara mema nkenye ezuva. Vamitili kwaturapo elikwamo omu ava pongayike yimaliva yipo vakarete mema nkenye ezuva govanona, nye nawo ngesi kapi vana kuyihafera morwa kuna kuvasotekwa. Kuna kuzuvhika asi vanona wokusika ko 70, ngesi kavahagekere sure morwa kwato mema, ano ava vana hupupo awo kuwiza nye kosure nkenye apa kuhulilira dogoro povili zomuyu. Varongwa kavatanterere mutjangi mbudi ogu apa kakdigwire sure ezi asi nondoroma edi mbali domema kapi dina kuvhura kuvatera vantu wovanzi ava vakara posure ezi, rambangako novantu nye vatunga pepi ava ava wiza nawo vayahundire mema posure morwa nakumwesi vana kuyuka.
Mukurona sure Joseph Sindimba,katanterere munambudi asi epiro mema kuna gumu unene varongwa, eyi yina kutwaredera asi ngesi awo kuna kufaura unene kosure.Varongi kuna kumoneka ngesi asi kuna kuronga tupu vanona wokusika komurongo mezuva monkondwarongero ano pwanare awo kwakara asi kusika ko40, monkondwarongero. Ano varongwa vamwe kunakuvadigopera sinano sokugenda nokilo 20, nkenye ezuva vawize kosure apa navayasikira awo vana roroka. Ano nsene vana roroka kapisi ureru vagazare eyi vana kuvaronga. Ano varongi awo kuwiza nye kosure noyikoverero yokunyata, morwa tumema nye oto vana kugwana kapi tavavhuru hena asi vakuhwe yidwara yawo. Sindimba katente asi udigu ou vaugava nare momawoko gomberewa zerongo zomukunda asi ngano vavapeke nawo pomba zavene, nampili ngano nondama nye vanayatulirepo nye magano nagenye aga kwato yarugana. Sure ngesi kwatjanga mbapira zezi komberwa zerongo momukunda ntani komukarelipo nosure momudingonoko kwaNzinze omu kavavatanterere udigu ou una kutwima wokupira mema ntani egano nye lyokukapata sure ezi morwa epiro mema. Varongwa kuna tokora kupata sure moutano una kuwiza nsene kapi vana kugwana ekohonono lyoudigu womema. Awo kuna kuyimona asi kapi tavavhuru kuza komeho kwahana mema.yimo ana kutanta mukurona sure. Nokunkondo peke asi awo vakondja kweyi varuganako dogoro papa, nye kuna kumoneka asi kapi vana kuvhura hena. Varongwa nawo kapi vana kugwana hena usura ou ava gwana wemelikwamo lyokrukukutu, kutunda tupu sure apa zina paturuka ngesi mosinema esi.
Mokukwama komukurona sure hawe nzara nazo kuna kukambekako kuwoko komukaro dona ogu. Varongi kuna kupa mutareli nosure domoNzinze asi age kapi ana kufira sinka nosure domomawiza, eyi vana kutanta asi ngesi age kapi ana didingura konyara mvhura zina kukapita. Mutareli ogu vana kuuyunga kuna kara Kletus Karondo. Nonkambadaro dokugwana nkumbu kwaKarondo hawe momema tupu, morwa funguna zendi kuna kazi kre zinadimi ezuva mnalinye. Ano funguna zomomberewa zomukuronagona gerongo momukunda Fanuel Kapapero, kuhagara kwato elimbururo. Sure zaKaparara kuna kara nontambodunge kutunda po zimwe dogoro ntambondunge zomurongo nantambali.