WINDHOEK – Omaliko ogendji gEpangelo unene omagumbo oshowo omatungo gomalukalwa oge li monkalo ya nika iipa noga kulupa, shika osha zi molopota ndjoka ya gandjwa kuLebbius Tobias moparliamende gOkomitiye yOlaata yOpashigwana yi nasha nOmapendulopo gIitopolwa. Pauyelele wolopota ndjoka, omaliko gamwe nenge omalukalwa gamwe ngoka omu na nokuli aantu shaa li paveta, omanga omagumbo nomalukalwa ngaka gepangelo taga thethwa – nokuhiilithwa kaaniilonga yamwe yepangelo. Omagumbo ogendji gepangelo unene ngaashi mOvenduka oga ningwa oongeshefa dhopaumwene – ano ga lundululilwa moongeshefa dhopaumwene, omanga aaniilonga yepangelo omayovi unene mboka ye na iiyemo iishona ihaya vulu okumona omalukalwa ge li nawa nogombiliha.
Okomitiye okwa li ya ningi omakonaakono nokutalela po omaliko ngaka gepangelo miitopolwa ngaashi Zambezi, Kavango, Oshikoto, Oshana, Omusati, Kunene naKhomas kuyele momwedhi Maalitsa omvula ndjika. Elalakano olya li okushilipaleka onkalo moka tamu adhika omaliko gepangelo oshowo nkene taga ungaungwa nago nokukalekwa po kUuministeli wIilonga nOmalweendo, oshowo okweeta po omathaneko nkene uuministeli tawu vulu okukatu onkatu.
Mokupopila olopota, Tobias okwe shi holola kutya okomitiye oye shi koneke kutya ope na omagumbo ogendji gepangelo moka mu na aakalimo shaa li paveta, oye shi mono wo kutya gamwe gomugo otaga longithwa ongoongeshefa dhopaumwene shoka shi li ompinge nomilanduveta dhi nasha nomalukalwa gepangelo. Omukalimo gwontumba moWindhoek North otaku tiwa kutya oha lendingitha – hiilitha oshitopolwa shimwe shegumbo kaakwashigwana yaZimbambwe mboka haya longelo mo ongeshefa yawo onene yokuhondja, nohaya futithwa N$1 500 komwedhi. Oshiholelwa oshikwawo otashi monika wo mOshomeya moka mu na omukalimo gumwe ngoka e li omupangi noha futu oshimaliwa shokuhiila kugumwe ngoka a li nale omuniilonga gwepangelo ngoka aniwa e mu fundja (omupangi ngoka omulumentu) kutya egumbo ndyoka okwe li landa ko kepangelo. Okomitiye natango oye shi koneke kutya oyendji yomaakalimo momalukalwa nomagumbo ngaka gaholomende kaye na omauvathano gokuhiila pokati kawo nepangelo ngaashi tashi uthwa komilanduveta dhomalukalwa nomagumbo. Okwa li wo sha monika mo kutya kape na omauyelele gi ihwapo ge nasha nomiyalu dhomagumbo gepangelo, nonkalo ndjika oya etitha omuyalu gomagumbo ogendji gepangelo ga kale ngashingeyi ga ningwa po omagumbo gopaumwene kumboka ye li mo. “Poompito odhindji ooshapi otadhi taambathanwa ashike, katambula kakwata, ihe uuministeli ihawu ningi po sha,” osho Tobias ta ti.
Okwa tseyithile Olaata yOpashigwana kutya omagumbo gepangelo oga longelwa wo omaushanda – omiyonena miitopolwa, oshoka kamu na aataleli yi ihwapo okutalela omaliko ngaka gepangelo. Miitopolwa ngaashi mOmusati oshowo oshitopolwa shaZambezi, kamu na nokuli nando omutaleli gumwe okushilipaleka eiyutho kooveta nomilanduveta dhokukala momagummbo nomalukalwa gepangelo. Okomitiye natango oye shi koneke kutya oompango nomilanduveta (dhi nasha nomalukalwa gepangelo) inadhi tseyika koyendji yomaakalimo oshowo aanambelewa yUuministeli wIilonga nOmalweendo. “Iinima ayihe mbika oya konekwa nawa kuuministeli ihe ihapu katukwa onkatu ya sha. Otashi monika kutya kape na oonkondo dhasha, nepulo ngashingeyi oli li mpaka kutya olye e na oonkondo – mushika? Uunake tatu ka tula miilonga oonkondo dhoka twa pewa?” Kansela goshikandjohogololo shaTsumeb, osho ta pula. Okomitiye ngashingeyi oya gandja elombwelo kUuministeli wIilonga nOmalweendo opo wu ninge omatalelopo omathimbo nomathimbo momalukalwa nomagumbo gepangelo opo ku uthwe mboka ye na okukala mo paveta, uumwene womalukalwa/omagumbo ngoka oshowo kutya aakalimo yamwe otaya longitha uunkundi mboka wu li po okulundulila omagumbo ngoka ga ninge po gawo gopaumwene nenge taye ga tula komadhina gawo pwaa na iifuta yasha.
Okomitiye oya hala ishewe uuministeli wu endeleleke omukalo gokulanditha po omagumbo ogendji gepangelo nokukatuka oonkatu okumona ko iimaliwa ayihe mbyoka yi niwe ongoshinima shomeendelelo. Tobias tango okwa holola elimbililo lye shi nasha niiyetwapothaneko oyindji mbyoka hayi etwa po kokomitiye yoparliamende kuuministeli wayooloka sha zi momakonaakono ogendji ga ningwa, ihe iiyetwapothaneko mbyoka ihayi monenwa omayamukulo nenge ihayi talika ko neitulomo okugandja omayakulo koparliamende. “Otashi monika sha fa kutya omauministeli getu ihage tu kutha ko neitulomo, ookomitiye odha simana noonkondo, tse ohatu yi mekwatathano naakwashigwana, ndele omauministeli ihaga kutha ko nando iinima neitulomo enene, otwa hala omayamukulo pamishangwa komaranda Nguvauva,” osho Tobias ta tumbula omanga a tala komupehaminista gUuministeli wIilonga nOmalweendo, Kilus Nguvauva, ngoka e li wo oshilyo shOlaata yOpashigwana.
Okwa gandja elondodho kutya ngele omauministeli itaga si oshimpwiyu shiinima – omaupyakadhi ngoka taga tumbulwa momishangwahokololo dhuukomitiye woparliamende, uukomitiye mbuka otawu ke shi tya ko kOmupresidende gOshilongo kutya omauministeli gamwe itaga gwanitha po iilonga yawo. Omupehaministeli gOmavi nOmatulululo,Theo Diergardt, moshipopiwa she mushika, okwa ti Olaata yOpashigwana oyi na oonkondo okwiithana omauministeli opo ge ye okugandja omayelithilo kutya omolwashike iinima yimwe inaye yi longa mo. Diergardt okwa ti kutya ethimbo olya thikana opo Olaata yOpashigwana yi kuthe ko oongaku – ano okulongitha oonkondo dhayo. Omupehaminista gUuministeli wIilonga nOmalweendo, Nguvauva okwa zimbula oonkundathana sigo oshikando tashi landula, nokwa uvaneke okugandja eyamukulo li ihwa po kiinima mbyoka ya tumbulwa momushangwahokololo nenge molopota.